मुंबई : मुंबईतून दुबईला जाणाऱ्या आणि दुबईतून मुंबईला येणाऱ्या एअर इंडिया कंपनीच्या विमानात तांत्रिक बिघाड झाल्यामुळे मुंबई आणि दुबई या दोन्ही विमानतळांवरप्रवासी तब्बल १५ तास लटकले होते. संतप्त प्रवाशांनी सोशल मीडियावरून संतापाला वाट मोकळी करून दिली.
उपलब्ध माहितीनुसार, शनिवारी रात्री साडेआठ वाजता एअर इंडियाचे विमान मुंबईतून दुबईला जाणार होते. मात्र, ऐनवेळी विमानामध्ये तांत्रिक बिघाड निर्माण झाल्यामुळे विमानाच्या उड्डाणाच्या वेळेचे पुनर्नियोजन करण्यात आले. अशा परिस्थितीत दुसऱ्या विमानाची सोय करून प्रवाशांना सोडणे अपेक्षित होते. मात्र, त्यावेळी कंपनीकडे दुसरे विमानच नसल्यामुळे प्रवाशांचा खोळंबा झाला. रात्री दीडच्या दरम्यान विमानाने मुंबईतून उड्डाण केले. त्याचवेळी दुबईतून मुंबईला रात्री ११ वाजून ४० मिनिटांनी उडणारे विमान रविवारी दुपारी ४ वाजून २० मिनिटांनी उडाले. त्यामुळे तिथेही प्रवाशांना मोठ्या अडचणींचा सामना करावा लागला.