मुंबई : मराठा समाजाच्या मागासलेपणाचा अभ्यास करण्यासाठी तातडीने स्वतंत्र समर्पित मागासवर्ग आयोग स्थापन करण्याचा निर्णय राज्य सरकारने घेतला आहे. मात्र, खासदार संभाजीराजे छत्रपती (Sambhaji Raje Chhatrapati) यांनी राज्य सरकारच्या या नवीन मागासवर्ग आयोगाला विरोध केला आहे. एक मागासवर्गीय आयोग असताना, मराठा समाजासाठी स्वतंत्र आयोग स्थापन करण्याची कायद्यात, घटनेत तरतूद नाही. उगाच समाजाची दिशाभूल करू नये, अशा शब्दात संभाजीराजे छत्रपती यांनी राज्य सरकारला ठणकावले आहे.
मराठा समाजाच्या विविध मागण्यांसाठी संभाजीराजे छत्रपती यांनी मुंबईतील आझाद मैदानात आजपासून उपोषण सुरू केले आहे. यावेळी त्यांनी मीडियाशी संवाद साधला. यावेळी समाजाला वेठीस धरू नये म्हणून मी एकट्याने आंदोलन करायचा निर्णय घेतला आहे. गेल्या 10 दिवसात महाराष्ट्रातील वातावरण बदलले. मला पाठिंबा म्हणजे छत्रपती शिवाजी महाराज, शाहू महाराज यांच्या विचारांना पाठिंबा आहे. शाहू महाराजांनी बहुजन समाजाला आरक्षण दिले. मी अठरा पगड जात,12 बलुतेदार यांना एकत्र आणण्याचा प्रयत्न करत आहे. गरीब मराठ्यांसाठी माझा लढा आहे. 2007 पासून महाराष्ट्रात फिरतोय, प्रत्येक दौऱ्यात आरक्षण का हवे याबाबत जनजागृती केली. समाजासाठी ज्यांनी बलिदान दिले, त्यांच्या माध्यमातून हे आंदोलन उभे राहिले, असे संभाजीराजे छत्रपती म्हणाले.
याचबरोबर, मराठा समाजाच्या मागासलेपणाचा अभ्यास करण्यासाठी तातडीने स्वतंत्र समर्पित मागासवर्ग आयोग स्थापन करण्याचा निर्णय राज्य सरकारने घेतला आहे. या मागासवर्ग आयोगबाबत विचारणा केली असता संभाजीराजे छत्रपती यांनी याला विरोध दर्शविला. एक मागासवर्गीय आयोग असताना, मराठा समाजासाठी स्वतंत्र आयोग स्थापन करण्याची कायद्यात घटनेत तरतूद नाही. उगाच समाजाची दिशाभूल करू नये, अशा शब्दांत ठणकावत संभाजीराजे छत्रपती यांनी मला मुख्यमंत्री, उपमुख्यमंत्री यांचे फोन आले होते. मी प्रवासात होतो, बोलणे मात्र झाले नाही, असे सांगितले.
'मी महाराजांचा वंशज, हा लढा मी लढायलाच हवा'मी महाराजांचा वंशज आहे. हा लढा मी लढायलाच हवा. हा माझा निर्णय आहे. अनेक आंदोलने केली. सरकारकडे मागण्या दिल्या. पण सरकारने शब्द पाळला नाही. शब्द न पाळल्याने मला दुसरा पर्याय राहिला नाही. मी जी चळवळ सुरू केली. त्यात समाज वेठीस धरला जाऊ नये म्हणून मी आमरण उपोषण सुरू केले आहे. 17 जूनला ज्या मागण्या केल्या होत्या. त्याच मागण्या आहेत. त्यात तसूभरही बदल केला नाही. पण सरकारने मागण्या मान्य केल्या नाही, असे संभाजीराजे छत्रपती यांनी सांगितले.
'कुंभकोणी काही भलतंच सांगतात'मागण्या फार छोट्या आहेत. आर्थिक महामंडळ मदत वाढवा, आर्थिक तरतूद करा. सारथी संस्था सबलीकरण,सक्षमीकरण करा. राज्यातील प्रत्येक जिल्ह्यात वसतिगृह मागणी केली होती. फक्त ठाण्यात सुरू झाले. मराठा आंदोलनातील आंदोलकांवरील गुन्हे मागे घेणार असल्याचे सरकारने स्पष्ट केले होते. पण अजून गुन्हे मागे घेतले नाही. एमपीएससीच्या विद्यार्थ्यांच्या मुलांचा विषय होता. त्यांचे सिलेक्शन झाले त्यांना अजून नियुक्त्या नाही. कोव्हिड कारण सांगून नियुक्ती देत नाहीत. सुपर न्यूमरी पद्धतीने मार्ग काढा. कोर्टाचा संबंध नाही. ते म्हणतात कोर्टाच्या निर्णयाचा भंग होईल. मला माहीत नाही काय भंग होईल. ते महा कुंभ कुंभकोणी काही भलतंच सांगतात, असे म्हणत संभाजीराजे छत्रपती यांनी राज्याचे महाधिवक्ता आशुतोष कुंभकोणी यांच्यावर निशाणा साधाला.