“सागवान तस्करांना राजकीय राजाश्रय मिळतो का?”; विजय वडेट्टीवार यांची कारवाई करण्याची मागणी

Congress Vijay Wadettiwar: चंद्रपूर येथील सागवान तस्करीबाबत विजय वडेट्टीवार यांनी ताजा दाखला दिला.

Congress Vijay Wadettiwar: नक्षलग्रस्त भागातील मौल्यवान सागवान लाकडाची तस्करी करणाऱ्या संघटित टोळ्यांना राजकीय पाठबळ मिळत असल्याचा गंभीर आरोप काँग्रेस विधिमंडळ नेते विजय वडेट्टीवार यांनी केला. चंद्रपूर मधील ब्रम्हपुरी मतदारसंघात तस्करांना पकडणाऱ्या वनविभागाच्या अधिकाऱ्यांना एका नेत्यांकडून अर्वाच्च भाषेत शिवीगाळ केली जाते आणि तस्करांना सोडवण्यासाठी दबाव टाकला जातो, असा मोठा दावा वडेट्टीवार यांनी विधानसभेत प्रश्नोत्तर काळात केला.

चंद्रपूर येथील सागवान तस्करीबाबत विजय वडेट्टीवार यांनी सभागृहात एका ताज्या घटनेचा दाखला देताना सांगितले की, चार दिवसांपूर्वी माझ्या मतदारसंघात वनविभागाच्या कनिष्ठ अधिकाऱ्याने सागवान लाकडाने भरलेले दोन ट्रॅक्टर पकडले होते. मात्र, एका स्थानिक नेत्याने थेट वनविभागाच्या कार्यालयात जाऊन अधिकाऱ्यांना आई-बहिणीवरून घाणेरड्या शिव्या दिल्या. या दबावाखाली अधिकाऱ्यांना जप्त केलेले ट्रॅक्टर आणि आरोपींना सोडावे लागले. ही साधी चोरी नसून शस्त्रांसह फिरणाऱ्या संघटित टोळ्यांचा हा धंदा आहे, असा गंभीर आरोप वडेट्टीवार यांनी केला.

चौकशी करून त्यांना कठोर शिक्षा दिली जाईल

नक्षलग्रस्त भागात जीव धोक्यात घालून काम करणाऱ्या वनविभागाच्या अधिकाऱ्यांच्या संरक्षणासाठी त्यांना शस्त्रे पुरवण्यात यावीत. तसेच या तस्करांचे, संबंधितांचे मोबाईल CDR तपासल्यास राज्यातील मोठ्या सागवान तस्करी रॅकेटचा उलगडा होईल असे वडेट्टीवार म्हणाले. याची दखल घेत वनमंत्र्यांनी ज्या अधिकाऱ्यांनी दबावाखाली येऊन तस्करांना सोडले, त्यांची चौकशी करून त्यांना कठोर शिक्षा दिली जाईल हे स्पष्ट केले.

दरम्यान, तसेच या घटनेतील परिसरातील CCTV फुटेज आणि संशयितांचे CDR तपासून या रॅकेटचा शोध घेतला जाईल. जर यामागे एखादी टोळी किंवा गुंडांच्या फौजा असतील, तर त्यांचा बंदोबस्त करून हे रॅकेट पूर्णपणे उद्ध्वस्त केले जाईल, असे उत्तर वनमंत्री गणेश नाईक यांनी दिले.