भोर-महाड रस्त्यावरील अपघातात मुंबईच्या तरुणाचा मृत्यू

भोर (पुणे), दि. 17 - भोर - महाड रस्त्यावर झालेल्या अपघातात मुंबईच्या तरुणाचा मृत्यू झाल्याची दुर्देवी घटना घडली आहे. नांदगाव वळणावर खोदलेल्या चारीत घसरलेल्या दुचाकीवरून समोरून येणारा टेम्पो गेल्याने संदीप कोंडिबा खिलारे (वय ३५, रा. मुंबई) या तरुणाचा जागीच मृत्यू झाला. बुधवारी सकाळी ९ वाजता ही  घटना घडली. टेम्पोचालकाला भोर पोलिसांनी ताब्यात घेतले आहे.

 

याबाबत भोर पोलिसांनी दिलेल्या माहितीनुसार, टेम्पो (एमएच ०६ बी.पी.) महाडवरून भोरकडे येत होता. दुचाकीवर ( एमएच १२ एल.डब्ल्यू. ५०५५) संदीप हा भोरकडून महाडकडे जात होता. नांदगाव गावच्या वळणावर आल्यावर रस्त्यात चारी काढली आहे. त्याचा अंदाज न आल्यामुळे चारीवर दुचाकी आदळून तो खाली पडला. दरम्यान, समोरून येणारा टेम्पो त्याच्या अंगावरून गेल्याने त्याचा जागीच मृत्यू झाला. या अपघाताची खबर टेम्पोचालक राकेश सुरेश भोईर (वय ३०, रा. रोहा, जि. रायगड) यांनी पोलिसांना दिली. पोलिसांनी भोईरला ताब्यात घेतले आहे.

 

भोर-महाड रस्त्यावर नांदगावजवळ पाईपलाईन करण्यासाठी रस्ता खोदून मोठी चारी काढली आहे. ती व्यवस्थित न बुजवता तिथे दगड मातीचा ढिगारा केला आहे. सार्वजनिक बांधकाम विभागाचे याकडे दुर्लक्ष होत असून, रस्ता खोदण्याची परवनागी घेतली आहे का? असा प्रश्न उपस्थित होत आहे. सदरच्या चारीमुळे अनेक लहान-मोठे अपघात घडत आहेत.