राज्यात होणार अडीच हजार महिला बचतगटांचे निर्माण

महिलांच्या सक्षमीकरणासाठी पुढाकार : राज्य शासनाकडून २७ कोटी रुपयांचे अनुदान

अनिल गवई /खामगाव
अल्पसंख्याक समुदायातील महिलांच्या आर्थिक सक्षमीकरणासाठी राज्य शासनाच्यावतीने २४00 बच तगट तयार केले जाणार आहेत. या बचतगटांच्या निर्मितीसाठी राज्य शासनाकडून २७ कोटी ५४ लक्ष रुपयांचे अनुदान मंजूर करण्यात आले आहे. पहिल्या टप्प्यात राज्यातील १२ शहरांमध्ये अल्पसंख्याक महिलांसाठी सुमारे २४00 बचतगटांची निर्मिती केली जाणार आहे. राज्य शासनाच्या महिला आर्थिक विकास महामंडळामार्फत ही योजना राबविली जाणार असून, यासाठी राज्य शासनाने १२ जानेवारी रोजीच्या शासन निर्णयानुसार २७ कोटी ५४ लाख ३२ हजार ६३९ रुपयांचे अनुदान मंजूर केले आहे. या माध्यमातून अल्पसंख्याक महिलांना संघटित करून, पुरेसा पतपुरवठा उपलब्ध करून देण्याचे शासनाचे धोरण आहे.

*कौशल्य प्रशिक्षण
महिला बचतगटांसोबतच अल्पसंख्याकबहुल क्षेत्रातील महिलांमध्ये उद्योजकीय कौशल्य विकसित करण्याच्या उद्देशाने त्यांना राज्य शासनाच्यावतीने प्रशिक्षण दिले जाणार आहे.

* पहिला टप्पा
राज्यातील अल्पसंख्याकबहुल क्षेत्रात वास्तव्यास असलेल्या अल्पसंख्याक महिलांच्या आर्थिक सक्षमीकरणासाठी पहिल्या टप्प्यात मुंबई शहर, मुंबई उपनगर, नांदेड, मालेगाव, कारंजा, परभणी, पुणे, नागपूर, औरंगाबाद, भिवंडी, मुंब्रा-कौसा आणि मिरज या शहरामध्ये २४00 बचत गट निर्माण करून, त्यांचे १३ लोकसंचलित साधन केंद्र आठ वर्षांच्या कालावधीत उभे केले जाणार आहेत.