Congress Vijay Wadettiwar News: इयत्ता पहिलीपासून सक्तीने हिंदी शिकवण्याविरोधात मनसे अध्यक्ष राज ठाकरे आणि उद्धवसेनेचे पक्षप्रमुख उद्धव ठाकरे आंदोलनाच्या मैदानात उतरले आहेत. ५ जुलैला मनसेचा मोर्चा निघणार आहे. या मोर्चाला उद्धव ठाकरे गटानेही पाठिंबा दिला आहे. तर राष्ट्रवादी काँग्रेस शरद पवार गटानेही या मोर्चाचे समर्थन केले आहे. दोन्ही गट या मोर्चात सहभागी होणार आहेत. मराठी भाषेच्या मुद्द्यावरून ठाकरे बंधू एकत्र येत असल्यामुळे कार्यकर्त्यांमध्ये नवचैतन्य निर्माण झाले आहे. आगामी महापालिका, स्थानिक स्वराज्य संस्थांच्या निवडणुकांच्या पार्श्वभूमीवर या मोर्चाला वेगळे महत्त्व प्राप्त झाले आहे. यातच आता काँग्रेसची भूमिका काय असेल, याकडे राजकीय वर्तुळाचे लक्ष लागले आहे.
काँग्रेसचे नेते विजय वडेट्टीवार यांनी याबाबत प्रतिक्रिया दिली. ते पत्रकारांशी बोलत होते. महाराष्ट्रात हिंदी सक्ती नको ही भूमिका आम्ही या आधीच मांडली आहे, जर ठाकरे बंधू एकत्र येऊन या विषयावर मोर्चा काढणार असतील, जर कुठल्याही बॅनरशिवाय मराठीसाठी मोर्चा काढला जाणार असेल आणि दोन्ही भावांचे निमंत्रण आले तर आम्ही विचार करू आणि त्याबाबत आमची भूमिका सकारात्मक असेल, असे वडेट्टीवार यांनी नमूद केले.
मला बाळा नांदगावकर यांचा फोन आला होता
काँग्रेस या मोर्चात सहभागी होणार का, असा प्रश्न विजय वडेट्टीवार यांना विचारण्यात आला. यावर, मला बाळा नांदगावकर यांचा फोन आला होता. त्यांनी मोर्चात सामील होण्याची विनंती केली आहे. सोबतच राज ठाकरे यांचाही स्वतंत्र निरोप आहे, हेही सांगितले. त्यामुळे माझ्या पक्षातील सर्व नेत्यांशी चर्चा करतो आणि आम्ही भूमिका घेऊ, असे वडेट्टीवार यांनी सांगितले.
दरम्यान, जर हे दोन्ही बंधू हिंदी सक्ती विरोधात एकत्र येत असतील तर आम्हाला निश्चितच त्याचा आनंद आहे. या निमित्ताने दोन्ही भावांच्या एकत्रिकरणाचे पुढचे पाऊल टाकले जात असेल तर आमची भूमिका समर्थनातच आहे. बिना झेंड्याचा बिना बॅनरचा जर मोर्चा असेल आणि हिंदी सक्ती विरोधात सर्व एकत्र येणार असेल. दोन्ही भावांनी पुढाकार घेतला असेल तर आमची भूमिका सकारात्मक राहील, असेही ते म्हणाले.