लग्नाचे आमिष दाखवून फसवणूक

लग्नाचे आमिष दाखवून दलित तरुणीची फसवणूक झाल्याचा प्रकार उघडकीस आला आहे. या प्रकरणी शिक्षकासह पाच व्यक्तींवर अ‍ॅट्रॉसिटीचा गुन्हा दाखल झाला असून दोन जणांना अटक केली आहे

नवी मुंबई : लग्नाचे आमिष दाखवून दलित तरुणीची फसवणूक झाल्याचा प्रकार उघडकीस आला आहे. या प्रकरणी शिक्षकासह पाच व्यक्तींवर अ‍ॅट्रॉसिटीचा गुन्हा दाखल झाला असून दोन जणांना अटक केली आहे. वाशी येथील मुलींच्या वसतिगृहात राहणार्‍या दलित तरुणीसोबत हा प्रकार घडला आहे. मूळची सांगली येथील शिराळा तालुक्यातील ही मुलगी आहे. याच जिल्ह्यातील बेजेगावातील सुमित पाटणकर या शिक्षकासोबत २०१२ पासून तिचे प्रेमसंबंध होते. यावेळी सुमित याने लग्नाचे आमिष दाखवून अनेकदा शारीरिक संबंध ठेवले होते. काही महिन्यांपूर्वी ही तरुणी पुढील शिक्षणास नवी मुंबईत आली होती. कोपरखैरणे येथील कॉलेजमध्ये शिक्षण घेत असताना ती वाशी येथील मुलींच्या वसतिगृहात रहात होती.काही दिवसांपूर्वी सुमित हा देखील नोकरीनिमित्ताने त्याच कॉलेजमध्ये आला होता. त्यामुळे पुन्हा त्यांच्यात जवळीक निर्माण झाली होती. या दरम्यान सुमित याने या मुलीला पुणे येथे नेऊन आई, वडिलांची भेट करून दिली. मात्र मुलगी दलित असल्याने घरच्यांनी त्यांच्या लग्नाला नकार दिला. तसेच सुमितचे वडील, आर्ई, काका, बहीण व भावोजी यांनी सदर मुलीला शिवीगाळ करत मारहाण केली. हा प्रकार मुलीने वडिलांना सांगताच त्यांनी देखील मुलाच्या घरी जाऊन लग्नाची विनंती केली. परंतु पोलीस कर्मचारी असलेल्या मुलीच्या वडिलांनाही सुमितच्या कुटुंबीयांनी शिवीगाळ केली. सुमित हा पीडित मुलगी राहत असलेल्या वाशी येथील ठिकाणी येऊन तिला त्रास देत होता. त्यामुळे पीडित तरुणी घर सोडून निघून गेली. अखेर सातारा येथून पोलिसांनीच या मुलीला घरी आणले. त्यानंतर पीडित मुलीच्या तक्रारीनुसार वाशी पोलिसांत गुन्हा दाखल झाला. पीडित व तिच्या वडिलांना जातिवाचक शिवीगाळ केल्याप्रकरणी सुमितचे वडील रत्नकांत पाटणकर, आई, काका, बहीण आणि भावोजी यांच्या विरोधात गुन्हा दाखल झाला आहे. याप्रकरणी सुमित व त्याच्या वडिलांना अटक केल्याचे वरिष्ठ पोलीस निरीक्षक राम पाठारे यांनी सांगितले. या दोघांनाही सीबीडी न्यायालयाने २८ मेपर्यंतची पोलीस कोठडी सुनावली. (प्रतिनिधी)