कॅम्पा कोलावर आता १७ जूनला होणार कारवाई!

वरळी येथील कॅम्पा कोला कम्पाउंडमधील इमारतींच्या बेकायदा मजल्यांवर आता १७ जून रोजी कारवाई करण्यात येणार आहे.

मुंबई : वरळी येथील कॅम्पा कोला कम्पाउंडमधील इमारतींच्या बेकायदा मजल्यांवर आता १७ जून रोजी कारवाई करण्यात येणार आहे. तत्पूर्वी १३ आणि १४ जून रोजी येथील रहिवाशांना कारवाई करण्यात येणार असल्याची आगाऊ सूचना म्हणून पालिकेतर्फे नोटीस धाडण्यात येणार आहे.
मुंबई महापालिका प्रशासनाने येथील रहिवाशांना घरे रिकामी करण्यासह घराच्या चाव्या सुपुर्द करण्यासाठी ७२ तासांची मुदत दिली होती. ही मुदत गुरुवारी सायंकाळी ५ वाजता संपली. दरम्यानच्या काळात रहिवाशांनी
घरे रिकामी केली. मात्र घराच्या चाव्या अद्याप काही पालिकेला सुपुर्द केलेल्या नाहीत. यावर अतिरिक्त आयुक्त मोहन अडताणी म्हणाले, शुक्रवार आणि शनिवारी कॅम्पा कोलाच्या रहिवाशांना कारवाई करणार असल्याची आगाऊ सूचना म्हणून नोटीस धाडण्यात येईल. त्यानंतर १७
जून रोजी प्रत्यक्षात येथील कारवाईला सुरुवात होईल. या कारवाई अंतर्गत इमारतीमधील बेकायदा मजल्यांची वीज आणि पाणी कापले जाईल.
दरम्यान, कॅम्पा कोला कम्पाउंडमध्ये रहिवाशांनी ठोकलेल्या तंबूलादेखील पालिकेने नोटीस बजावली आहे. या कारवाई अंतर्गत हा तंबूही उखडला जाणार आहे. महत्त्वाचे म्हणजे कॅम्पा कोलावरील कारवाईसाठी पालिका प्रशासनाने कंत्राटदारांकडून निविदा मागविल्या होत्या. मात्र अद्याप एकाही कंत्राटदाराने निविदा प्रक्रियेत रस दाखविलेला नाही. परिणामी निविदा प्रक्रियेस विलंब झाला तरी आता कारवाई थांबणार नाही, असेही अडताणी यांनी स्पष्ट केले. (प्रतिनिधी)