ठाण्यातील धाडसत्रामुळे अहमदाबादचे कॉल सेंटर झाले बंद!

७० जणांना अटक केल्याचे वृत्त देशभर पसरताच अहमदाबाद येथील प्रल्हादनगरमधील पिनॅकल बिझनेस सेंटर हे कॉल सेंटरही तडकाफडकी बंद करण्यात आले

जितेंद्र कालेकर/ऑनलाइन लोकमत
ठाणे, दि. 9 - जिल्हयातील मीरा रोड येथील सात कॉल सेंटरवर गुन्हे अन्वेषण विभागाने धाड टाकून ७० जणांना अटक केल्याचे वृत्त देशभर पसरताच अहमदाबाद येथील प्रल्हादनगरमधील पिनॅकल बिझनेस सेंटर हे कॉल सेंटरही तडकाफडकी बंद करण्यात आले आहे. हे कॉल सेंटर बंद झाल्यामुळे येथील ४०० ते ५०० कर्मचाऱ्यांवर बेरोजगारीची कुऱ्हाड कोसळली आहे. या कर्मचाऱ्यांनी कोणा कोणाला फसविले, याचाही तपास आता ठाणे गुन्हे अन्वेषण विभागाचे अधिकारी गुजरात पोलिसांच्या मदतीने करीत आहेत.
अहमदाबाद शहरातील प्रल्हादनगरमधील या पिनॅकल बिझनेस सेंटरमध्ये चार कॉल सेंटर अशाच प्रकारे सुरू होती. तिथूनही अमेरिकेत धमक्या देणारे, फसवणुकीचे तसेच खंडणी उकळण्याचे प्रकार सुरू होते. याबाबतची खातरजमा झाल्यानंतर ८ आॅक्टोबर रोजी पोलीस उपायुक्त पराग मणेरे, युनिट एकचे वरीष्ठ पोलीस निरीक्षक नितीन ठाकरे, खंडणी विरोधी पथकाचे निरीक्षक एन. टी. कदम, अनैतिक मानवी वाहतूक प्रतिबंधक कक्षाचे निरीक्षक रवींद्र दौंडकर, उपनिरीक्षक विजय उपाळे आदींच्या पथकाने त्या ठिकाणी शनिवारी धाडसत्र राबविले. मात्र, चार पैकी एकाही कॉल सेंटरवर कर्मचारी सोडा कोणतीही साधनसामुग्री उपलब्ध पोलिसांना मिळाली नाही. ५ आॅक्टोबरला ठाण्यात धाड टाकल्याचे समजल्यानंतर ६ आॅक्टोबरला एकाच दिवसात कॉल सेंटर रिक्त करण्यात आले. त्याचदिवशी कॉल सेंटरच्या भाड्यापोटीची रक्कमही संबंधितांना अदा करण्यात आली. अहमदाबाद पाठोपाठ दिल्ली, चंदीगड, कलकत्ता या शहरांमध्येही अशाच प्रकारे फसवणूक करणारे कॉल सेंटर सुरू होते. त्यांनीही तिथून पळ काढला आहे. अर्थात, देशभरात कोणत्याही ठिकाणी त्याबाबतची माहिती मिळाल्यास तेथील स्थानिक पोलिसांच्या मदतीने ठाणे पोलीस कारवाई करणार असल्याची माहिती सूत्रांनी दिली.
..........................
मीरा रोड मध्ये पुन्हा कारवाई
*मीरा रोड मध्ये ठाणे पोलिसांनी ८ आॅक्टोबर रोजी पुन्हा दुसरे धाडसत्र राबविले. या कारवाईत काशीगाव रोड नाक्याजवळ रामदेव प्लाझा इमारतीच्या तिसऱ्या मजल्यावर मोहसिन फतवारी या कॉल सेंटर चालकाला पोलिसांनी ताब्यात घेतले. याठिकाणी ८५ पैकी ६१ संगणकांचे हार्डडिस्क आणि काही कागदपत्रे ताब्यात घेऊन कॉल सेंटरला सिल करण्यात आले.
* मीरा रोड येथील रसाज सर्कल, शांती प्लाझा येथील मेसर्स पेअर ग्लो सर्व्हिसेस प्रा. लि. या कॉल सेंटरवरही कारवाई झाली. याठिकाणी २१ पैकी १८ संगणकांचे हार्डडिस्क कारवाईपूर्वीच काढलेले आढळले. अमेरिकन नागरिकांची फसवणुकीसाठी कॉल सेंटरच्या कर्मचाऱ्याकडून उपयोगात आणण्याचा सूचना फलक, त्यावर त्याचे नाव, त्यांना दिलेले टार्गेट, कॉलच्या दरम्यान वापरण्याचे टोपण नाव आणि दिनांकांचा उल्लेख असलेला फलकही जप्त केला आहे.
......................
* मीरा रोड पूर्व येथील स्पेस रिअ‍ॅलिटी ९१२ इमारतीमधील राकेश शकला याचा डिवाईन सोल्युशन्स या कॉलसेंटरवरही धाड टाकण्यात आली. त्याठिकाणच्या सर्वच म्हणजे ३९ संगणकांचे हार्डडिस्क आधीच काढलेले आढळले.
*तर सदाशिव इमारतीच्या बाजूला असलेल्या इमारत क्र. ६ मध्ये दिनेश वैश्य याचे कॉल सेंटर बंद केल्याचे आढळले. त्याठिकाणी १६ संगणकांचे हार्डडिस्क, सर्व्हर आणि कागदपत्रे सहायक पोलीस आयुक्त मुकूंद हातोटे यांच्या पथकाने जप्त केली.
----------------
२०० जणांच्या पथकाची नॉनस्टॉप कारवाई
५ आॅक्टोबर रोजी मीरा रोड भागात ठाणे शहर आणि ग्रामीण पोलिसांच्या २०० जणांच्या पथकाने कॉल सेंटरवर कारवाई केली होती. त्यानंतर सलग पाचव्या दिवशीही वेगवेगळया ठिकाणी या पथकांकडून अविरत कारवाई सुरू आहे.