अबबऽऽऽ कोंबड्यांना दिली जातेय चक्क दारूची मात्रा !

लय भारी टॉनिक : वजन वाढविण्यासाठी पोल्ट्री फार्म चालकांची नामी शक्कल

भुर्इंज : ‘धंदा है पर गंदा है’ असं आपणाकडे विनोदानं म्हटलं जाते. धंदा चांगला करण्यासाठी व्यापारी नको ते उद्योग करत असल्याचे आपण पाहतो. पोल्ट्री व्यावसायीक असेच काहीसे करत आहेत. कोंबड्यांचे वजन वाढावे, यासाठी पोल्ट्रीचालक कोंबड्यांना दारूची मात्रा देत आहेत. शेतातील पिकांवर किड नियंत्रणासाठी आजवर दारू फवारली जात होती. आता मात्र पोल्ट्री फार्ममधील कोंबड्यांना वजन वाढविण्यासाठी चक्क दारूचे टॉनिक दिले जात आहे. दारू पाजल्यामुळे कोंबड्यांना भूक वाढते. परिणामी त्यांचे वजन वाढते. वजन वाढल्यामुळे पैसेही चांगले मिळत असल्याचे कुकूटपालन व्यावसायिकांचे म्हणणे आहे. पोल्ट्री फार्ममध्ये पाळल्या जात असलेल्या कोंबड्यांचे वजन जास्तीत जास्त असावे, यासाठी विविध प्रकारांच्या खाद्यांबरोबरच विविध औषधांचाही वापर केला जातो. अवघ्या ४५ दिवसांत कोंबड्यांची वाढ परिपूर्ण व्हावी, यासाठी त्यांचे पालनपोषण कसे करावे यासंदर्भात विविध मतप्रवाह आहेत. त्यांचे पालनपोषण नैसर्गिक की अनैसर्गिक पद्धतीने करावे, याबाबतही वाद-विवाद आहेत. काही व्यवसायिक कोंबड्यांचे वजन जास्तीत जास्त वाढविण्यासाठी नाना क्लृप्त्या लढवत आहेत. त्यातूनच जिल्ह्यातील काही व्यावसायिकांनी कोंबड्यांना दारू पाजणे सुरू केले आहे. त्यातून आर्थिक भरभराट साधण्याचे प्रयत्न केले जात आहे. (वार्ताहर) औषधे परवडत नाहीत, त्यामुळे काहीही...! अनेक नामांकित कंपन्या पोल्ट्री फार्मचालकांना विशिष्ट भाडेतत्त्वावर कोंबड्यांची पिल्ले सांभाळण्यासाठी देत असतात. त्याच्या मोबदला दिला जातो. मात्र, या पैशांत कोंबड्यांचे वजन वाढविण्यासाठी टॉनिक, औषधे खरेदी करणे पोल्ट्री व्यावसायिकांना परवडत नाही. तरीही अनेक ठिकाणी औषधे खरेदी करुन त्यांना दिले जाते. मात्र, कमी खर्चात जास्तीत जास्त उत्पन्न मिळविण्यासाठी काही व्यावसायिक कोंबड्यांना दारू देत आहेत.