आदिवासी विद्यार्थ्यांची कलाकृती; बांबूपासून अप्रतिम राख्या!

 

अकोला : कौशल्य अंगी असेल तर कामाची वानवा नाही, अशी अनेक उदाहरणं जगात आहेत. म्हणूनच शासनदेखील किमान कौशल्यावर आधारित अभ्यासक्रम प्रशिक्षणावर भर देत आहे. आदिवसीमध्ये उपजतच कलागुण आहेत. या कलागुणांना वाव देण्यासाठी अकोलाच्या डॉ.पंजाबराव देशमुख कृषी विद्यापीठानेही मेळघाटातील आदिवासी विद्यार्थ्यांना किमान कौशल्यावर आधारित प्रशिक्षण देण्यास सुरुवात केली असून, राखी पौर्णिमेचा सण पाहता प्रशिक्षणार्थी विद्यार्थ्यांनी निसर्गाशी नाळ जोडत बांबूपासून अप्रतिम राख्या तयार केल्या आहेत. स्वातंत्र्यदिनी कृषी विद्यापीठाच्या अकोला येथील मुख्यालयात या राख्यांचे प्रदर्शन भरवले जात आहे.

बांबूपासून बनवलेल्या राख्या यावर्षी रक्षाबंधनासाठी बाजारात येत असून, मेळघाटसारख्या अतिदुर्गम भागातील विद्यार्थ्यांनी बनवलेल्या राख्यांचा त्यामध्ये समावेश असेल. डॉ. पंजाबराव देशमुख कृषी विद्यापीठांतर्गत मेळघाटातील धारणी येथे मागील दोन वर्षांपूर्वी या भागातील विद्यार्थ्यांसाठी कृषितंत्र विद्यालय सुरू  केले आहे. येथे विद्यार्थ्यांना वेगवेगळे तंत्रज्ञान प्रशिक्षण, शिक्षण देण्यात येत आहे. येथील ४० आदिवासी विद्यार्थ्यांनी १३ ते १४ आॅगस्ट या दोन दिवसीय राखी व हस्तकला प्रशिक्षण घेतले असून, अमरावती जिल्ह्यातील धारणी तालुक्यातील लवादा येथे बांबू केंद्र आहे. येथे विद्यार्थ्यांना हस्तकला व बांबूपासून राखी बनविण्याचे प्रशिक्षण देण्यात आले. राखीसोबतच बांबूपासून महिलांना वेणीला लावण्यात येणारे किल्पस, चिमटा व इतर साहित्य तयार केले आहे. 

 धारणी येथील कृषितंत्र विद्यालयाचे प्रकल्प अधिकारी डॉ.आर.टी. रघुवंशी, डॉ.एस.के. बुुरघाटे, कृषी सहायक नीलेश भगत आणि  तुषार कानडी यांनी विद्यार्थ्यांना प्रोत्साहन दिले. प्रशिक्षणात प्रथम आणि व्दितीय वर्षातील विद्यार्थ्यांचा सहभाग होता.

- मेळघाटात रोजगार निर्मितीला चालना देण्याचा प्रयत्न

आदिवासी बांधवामध्ये उपजत कलागुण आहेत. त्या कलागुणांचा वापर रोजगारनिर्मिती केल्यास मेळघाटसारख्या अतिदुर्गम भागातील आदिवासी विद्यार्थी, येथील नागरिक यांना रोजगार उपलब्ध होईल. परिणामी त्यांचे शहराकडे होेणारे स्थलांतर थांबेल. त्यादृष्टीने डॉ. पंजाबराव देशमुख कृषी विद्यापीठाने दोन वर्षांपूर्वी येथे कृषितंत्र विद्यालय सुरू  केले आहे. येथील विद्यार्थ्यांचा चांगला प्रतिसाद आहे.

 

 

निसर्गाशी नाळ जोडत आदिवासी विद्यार्थ्यांनी अप्रतिम राख्या व इतर साहित्य तयार केले आहे. त्यांच्या या निसर्ग वस्तूंचे १५ आॅगस्टला कृषी विद्यापीठात प्रदर्शन भरविण्यात येत आहे.

डॉ. किशोर बिडवे,

 कुलगुरू चे तांत्रिक सचिव,

डॉ. पंदेकृवि, अकोला.