लोकमत न्यूज नेटवर्क, मुंबई: मुख्यमंत्र्यांकडील विषयांसदर्भात बैठक घेतल्याने उठलेले वादळ शांत होते ना होते, तोपर्यंत अजित पवार यांनी राधाकृष्ण विखे-पाटील यांच्याकडे असलेल्या विषयासंदर्भात बैठक घेतल्याने सगळ्यांच्या भुवया उंचावल्या आहेत.
राधाकृष्ण विखे-पाटील राज्याचे दुग्धविकास व पशुसंवर्धन मंत्री आहेत. राज्यातील धनगर, मेंढपाळ समाजाचा विषय त्यांच्या खात्यांतर्गत येतो. अजित पवार यांनी सोमवारी राज्यातील धनगर, मेंढपाळ समाजाच्या समस्या सोडवणे तसेच विकास योजनांच्या अंमलबजावणीबाबत बैठक घेतली.
या बैठकीला दुग्धविकास व पशुसंवर्धन विभागाचे वरिष्ठ अधिकारी उपस्थित होते. विशेष म्हणजे, पशुसंवर्धन मंत्री राधाकृष्ण विखे-पाटील मुंबईत असूनही या बैठकीकडे फिरकले नाहीत. अजित पवार आणि विखे-पाटील यांचे जुने राजकीय वैमनस्य आहे. त्यामुळे या बैठकीच्या माध्यमातून पवार यांनी विखे-पाटील यांच्यावर कुरघोडी करण्याचा प्रयत्न केल्याची चर्चा आहे.
उत्पन्नाच्या शाश्वत स्रोतासाठी...
मेंढ्यांच्या पालन-पोषणासाठी चराई क्षेत्रालगतची जमीन अर्धबंदिस्त निवाऱ्यासाठी प्रायोगिक तत्त्वावर उपलब्ध करून दिल्यास मेंढपाळ, धनगर बांधवांच्या सामाजिक, आर्थिक विकासासाठी उत्पन्नाचा शाश्वत स्रोत निर्माण होऊ शकेल. यादृष्टीने पशुसंवर्धन व दुग्धविकास विभागाने आवश्यक कार्यवाही करावी, अशा सूचना अजित पवार यांनी या बैठकीत दिले.