१३/७ स्फोटांचा फायनान्सर अटकेत

तीन वर्षांपूर्वी मुंबईत घडलेल्या तिहेरी बॉम्बस्फोटांचा फायनान्सर अब्दुल मतीन दामदा फकी ऊर्फ फारूक याला राज्य दहशतवादविरोधी पथकाने (एटीएस) गोव्यातील इमिग्रेशन अधिकाऱ्यांच्या मदतीने अटक केली.

मुंबई : तीन वर्षांपूर्वी मुंबईत घडलेल्या तिहेरी बॉम्बस्फोटांचा फायनान्सर अब्दुल मतीन दामदा फकी ऊर्फ फारूक याला राज्य दहशतवादविरोधी पथकाने (एटीएस) गोव्यातील इमिग्रेशन अधिकाऱ्यांच्या मदतीने अटक केली. मतीनने मुंबई स्फोटांसाठी इंडियन मुजाहिद्दीन या अतिरेकी संघटनेला दुबईतून हवालामार्फत १० लाख रुपये धाडले होते.
१३ जुलै २०११ रोजी मुंबईत आॅपेरा हाऊस, झवेरी बाजार आणि कबुतरखान्याजवळ बॉम्बस्फोट घडले होते. या स्फोटांचा मुख्य सूत्रधार मोहंमद अहमद सिद्धीबाप्पा ऊर्फ यासीन भटकळसह एकूण सात आरोपी गजाआड आहेत. या आरोपींच्या चौकशीतून मुजफ्फर कोला आणि मतीन या दोघांची नावे उघड झाली. तसेच मतीन हा मुजफ्फरचा मेहुणा असून, या दोघांनी हे बॉम्बस्फोट घडविण्यासाठी यासीन भटकळ आणि साथीदारांना लाखो रुपयांचे फायनान्स केल्याची माहिती समोर आली होती. एटीएस सूत्रांनी दिलेल्या माहितीनुसार, बॉम्बस्फोटांचा कट शिजल्यानंतर मतीनने दुबईतून हवालामार्फत १० लाख रुपये दिल्लीतील ज्वेलर कन्वर पथीजा याच्याकडे पाठवले होते. यासीनने पथीजाकडून १० लाख घेतले होते. अटक आरोपींमध्ये कन्वरचा सहभाग असून मुजफ्फर, मतीन यांच्यासह एकूण सात आरोपी फरार होते. या सातही आरोपींविरोधात विशेष मोक्का न्यायालयाने अजामीनपात्र वॉरन्ट जारी केले तसेच या सर्वांविरोधात देशभरातील सर्व विमानतळांवर लूक आऊट सर्क्युलरही जारी करण्यात आले होते. त्यामुळे प्रत्येक विमानळावरील इमिग्रेशन अधिकाऱ्याकडे स्फोटातील सातही फरार आरोपींचे फोटो आणि तपशील होते. दरम्यान, मतीन सोमवारी दुबईहून गोव्याच्या आंतरराष्ट्रीय विमानळावर उतरला. विमानतळावर उतरून घाईघाईने बाहेर पडण्याच्या प्रयत्नात असलेल्या मतीनला तेथील इमिग्रेशन अधिकाऱ्यांनी ओळखले. लगोलग त्याला ताब्यात घेण्यात आले.
एटीएस अधिकाऱ्यांना कळवून मतीनला दांबोली विमानतळ पोलिसांच्या हवाली करण्यात
आले. एटीएसने त्याला मुंबईत आणून अटक केली. (प्रतिनिधी)