१०५८ सार्वजनिक गणपतींची स्थापना

शुक्रवारपासून सुरू होत असलेल्या गणेशोत्सवासाठी शहर पोलिसांनी कंबर कसली आहे. उपराजधानीत १०५८ सार्वजनिक गणेश मंडळ गणपतींची स्थापना करणार आहेत. शहर पोलिसांनीही कडेकोट बंदोबस्त ठेवला आहे.

कडेकोट बंदोबस्तात होणार गणरायाचे आगमन
नागपूर : शुक्रवारपासून सुरू होत असलेल्या गणेशोत्सवासाठी शहर पोलिसांनी कंबर कसली आहे. उपराजधानीत १०५८ सार्वजनिक गणेश मंडळ गणपतींची स्थापना करणार आहेत. शहर पोलिसांनीही कडेकोट बंदोबस्त ठेवला आहे.
आगामी विधानसभा निवडणुकीच्या पार्श्वभूमीवर गणेशोत्सवादरम्यान विशेष लक्ष ठेवण्याच्या सूचना गुप्तचर संस्थांकडून मिळालेल्या आहेत. दहशतवाद्यांकडून गडबड करण्याची शक्यता लक्षात घेता सुरक्षा व्यवस्था ‘फुल प्रुफ ’ठेवण्याचे निर्देश देण्यात आले आहेत. या पार्श्वभूमीवर गुरुवारी रात्रीपासूनच पोलिसांचे साप्ताहिक अवकाश बंद करण्यात आले आहेत. शुक्रवारी सकाळपासूनच चितारओळ येथून गणेश मूर्ती स्थापनेसाठी आपापल्या ठिकाणी रवाना होतील. यासाठी चितारओळ, बडकस चौक, सेंट्रल एव्हेन्यू आदी ठिकाणी पोलिसांचा बंदोबस्त वाढविण्यात आला आहे. दोसर भवन चौकात अस्थायी पोलीस चौकी उभारण्यात आली आहे. गणेशोत्सवादरम्यान सुरक्षेसाठी शुक्रवारी एक उपायुक्त, दोन सहायक आयुक्त, पाच पोलीस निरीक्षक, तीन सहायक निरीक्षक, ३० उपनिरीक्षक, ७८३ पुरुष आणि ११२ महिला पोलीस कर्मचारी तैनात करण्यात आले आहेत. याशिवाय एसआरपीची एक कंपनी, ५ पोलीस निरीक्षक, १५ प्रशिक्षु पोलीस उपनिरीक्षक, २५ महिला आणि ७५ पुरुष प्रशिक्षु शिपाई उपलब्ध करून देण्यात आले आहेत. पोलिसांनी गणेश मंडळांना सीसीटीव्ही कॅमेरे आणि मेटल डिटेक्टर्स लावण्याचे आणि स्वयंसेवकांची नियुक्ती करण्यास सांगितले आहे. पोलिसांनी डीजे चा वापर करण्याची मनाईसुद्धा केली आहे. (प्रतिनिधी)