चाकुरात आगीत दोन दुकाने भस्मसात

चाकूर (जि. लातूर) : चाकुरातील मुख्य बाजारपेठेतील दोन दुकानांना सोमवारी पहाटे आग लागली. त्यात दोन्ही दुकानातील साहित्य, फर्निचर जळून २६ लाख ५० हजारांचे नुकसान झाले. या आगीची धग लागून एकजण गंभीररित्या भाजला.

चाकुरातील मुख्य बाजारपेठेत संभाजी लोंढे यांचे टेलरिंग मटेरियलचे होलसेल दुकान आहे. त्यालगत उस्मान शेख यांचे इंटरनेट कॅफे सेंटर आणि जॉबवर्कचे दुकान आहे. रविवारी रात्री संभाजी लोंढे यांचा मुलगा सुरज लोंढे (२५) हा दुकानावरील घरी झोपला होता. पहाटेच्या सुमारास तो लघुशंकेसाठी बाहेर आला असता, दुकानातून धूर निघत असल्याचे दिसले. त्यामुळे त्याने दुकानाचे दार उघडताच आतून आगीच्या ज्वाळा त्याच्यावर आल्या. यात त्याचा चेहरा, मान, छाती, दोन्ही हाताचे भाग भाजले. त्याला येथील ग्रामीण रुग्णालयात प्रथमोपचार करुन लातूरच्या शासकीय रुग्णालयात दाखल करण्यात आले आहे.

दरम्यान, या आगीत लोंढे यांच्या दुकानातील दोन मशीन, फर्निचर, टेलरिंगचे साहित्य जळले. त्यात २२ लाखांचे नुकसान झाले आहे. या दुकानालगतच्या उस्मान शेख यांच्या दुकानातील ४ संगणक संच, ३ प्रिंटर्स, साऊंड सिस्टिम, फर्निचर असे असे एकूण ४ लाख ५० हजारांचे नुकसान झाले आहे. सोमवारी सकाळी पोलीस निरीक्षक सोपान सिरसाट, हेडकाॅन्स्टेबल हणमंत आरदवाड यांनी घटनास्थळी भेट देऊन पाहणी करुन पंचनामा केला. या आगीचे कारण समजू शकले नाही.