पर्यटकांना खुणावतेय वडवळचे संजीवनी बेट

वडवळ नागनाथ : दुर्मीळ वनस्पतींचा खजिना व नैसर्गिक वैभव प्राप्त असलेल्या वडवळ नागनाथ परिसरातील संजीवनी बेटाने पावसामुळे हिरवा शालू पांघरला असून, हे बेट उत्तरा नक्षत्राच्या प्रारंभी पर्यटकांना खुणावत आहे.

यंदा जिल्ह्यात समाधानकारक पावसाने हजेरी लावली आहे. त्यामुळे वडवळ नागनाथ परिसरातील संजीवनी बेटावर हिरवळ पसरली आहे. महत्त्वाचे ऐतिहासिक पर्यटन केंद्र व्हावे म्हणून या बेटाला पर्यटनाचा 'क' दर्जा आहे. दुर्मीळ वनोषधीचा येथे खजिना असल्याने दरवर्षीच्या उत्तारा नक्षत्रात पर्यटकांची अलोट गर्दी असते. वर्षभरही या संजीवनीच्या पर्यटन स्थळाला राज्यातूनच नव्हे तर परराज्यातून पर्यटकांसह शाळा, महाविद्यालयांच्या सहली भेट देतात. या बेटावर दुर्मीळ वनौषधी वर प्रक्रिया करणारे केंद्र व्हावे रसशाळा, पंचकर्माचे युनिट, आयुर्वेद काॅलेज व्हावे, अशी ही मागणी होत आहे; मात्र शासनाचे या बेटाकडे दुर्लक्ष असल्याने संजीवन बेट विकासापासून वंचित आहे. बेटावर वनस्पतीच्या सेवनासाठी महाराष्ट्रासह कर्नाटक, आंध्र प्रदेशातील रुग्ण दाखल होतात. या बेटावरील वनस्पती व मातीचे आर्युेवेद तज्ज्ञांनी परिक्षण केले आहे. बेटावरील माती लालसर रंगाची असून, लोहाचे ३३ टक्के प्रमाण आहे. हा भाग समुद्र सपाटीपासून १ हजार फूट उंचीवर असल्याने येथील हवा शुद्ध असल्याने येथील वनस्पती गुणकारी असल्याचे तज्ज्ञ सांगतात.

या बेटावर आहे दुर्मीळ वनस्पती...

या संजवनी बेटावर राजहंस, निर्मळी, शंखपुष्पी, काळी टाकळी, आडसुळा, गुळवेल, शतावरी, जटाशंकर, अनंतमुळ, सर्पगंधा, सफेद मुसळी, कवच बीज, कोरफड, रानमिरची, भुईकोहळा, पाषाणकंद, मदनफळ, लोखंडी खडक शेपु यांसह दुर्मीळ वनस्पती आहेत. या बेटावर वनस्पतीचे संवर्धन, संरक्षण, संशोधन होणे गरजेचे आहे. कायमस्वरूपी पाण्याची सोयही आवश्यक असून, प्रशासनाने लक्ष देण्याची मागणी होत आहे.