‘ई-पाॅस’ मशीनवर अंगठा न देताच ग्राहकांना मिळणार रेशन

लातूर : कोरोनाच्या संकटामुळे संचारबंदी लागू करण्यात आली आहे. या काळात रेशन कार्डधारकांना मोफत धान्य देण्याचे जाहीर करण्यात आले होते. त्यानुसार नियोजनही पूर्ण झाले आहे. मात्र ई-पाॅस मशीनवर कार्डधारकाला अंगठा देऊनच धान्य घ्यावे लागणार होते. त्यामुळे कोरोनाचा प्रादुर्भाव वाढण्याचा धोका असल्याने ही अट रद्द करण्याची मागणी दुकानदारांकडून करण्यात आली होती. त्यानुसार रेशन कार्डधारकांना अंगठा न देताच मे महिन्यात मोफत धान्य मिळणार आहे.

जिल्ह्यात ४ लाख ४ हजार ३७३ रेशन कार्डधारक आहेत. यामध्ये एपीएल ६० हजार १९२, प्राधान्य कुटुंब लाभार्थी ३ लाख २ हजार ७६६, तर अंत्योदयचे ४१ हजार ४१५ लाभार्थी आहेत. सर्व कार्डनुसार १८ लाख ६१ हजार ७८४ सदस्यांची संख्या आहे. संचारबंदीच्या पार्श्वभूमीवर मे महिन्यात मोफत धान्य देण्याचे जाहीर करण्यात आले होते. त्यानुसार पुरवठा विभागाच्या वतीने नियोजन करण्यात आले. रेशन कार्डधारकांना धान्य घेताना ई-पाॅस मशीनवर अंगठा देणे बंधनकारक आहे. मात्र, सध्याची परिस्थिती पाहता या बाबीमुळे कोरोनाचा प्रादुर्भाव वाढण्याचा धोका अधिक असल्याचे रेशन दुकानदार संघटनेच्या वतीने शासनाच्या निदर्शनास आणून दिले.

मोफत धान्यामुळे अनेकांना आधार

जिल्ह्यात ४ लाख ४ हजार ३७३ कार्डधारक आहेत. कोरोनाच्या या संकटकाळात आधार मिळावा, यासाठी धान्य वितरित करण्याचे नियोजन करण्यात आले आहे. जिल्हा पुरवठा विभागाच्या वतीने गहू, तांदळाचे आवंटन मंजूर करण्यात आले होते.

प्रत्येक स्वस्त धान्य दुकानात रेशन माल पोहोचला आहे. त्यामुळे कोरोना नियमांचे पालन करीत वितरण सुरू झाले आहे. संचारबंदीमुळे अनेकांना आर्थिक अडचणींचा सामना करावा लागत आहे. त्यात मोफत धान्य मिळत असल्याने अनेकांची गैरसोय दूर होण्यास मदत झाली आहे. शासनाच्या या निर्णयाचे अनेकांनी समाधान व्यक्त केले.

कोरोनाचा प्रादुर्भाव वाढत असल्याने रेशन दुकानांवर प्रतिबंधात्मक उपाययोजनांचे काटेकोरपणे पालन केले जात आहे.

प्रत्येक रेशन कार्डधारकाला मास्क वापराबाबत सूचना करण्यात येत आहेत. तसेच फिजिकल डिस्टन्स आणि सॅनिटायझरचा वापर होत आहे.

पुरवठा विभागाच्या नियमानुसार रेशन दुकानावर धान्य वितरण होत आहे.