रस्त्यावरील एका विद्युत खांबामुळे अहमदपुरात दोन कि.मी.पर्यंत वाहतूक ठप्प

अहमदपूर : शहरात सातत्याने वाहतुकीची कोंडी होत आहे. शहरातील अंबाजोगाई रोडवरील ग्रामीण रुग्णालयासमोरील एका विद्युत खांबामुळे तब्बल दोन कि.मी.पर्यंत वाहतूक ठप्प होत आहे. याकडे महामार्ग प्राधिकरण व पोलिसांचे दुर्लक्ष होत असल्याचे पाहावयास मिळत आहे. विशेष म्हणजे, वाहतूक नियंत्रणासाठी केवळ दोन होमगार्ड असल्याने वाहतुकीची समस्या सातत्याने उद्भवत आहे.

अहमदपूर शहरातून नागपूर- रत्नागिरी आणि अहमदपूर- अंबाजोगाई हे दोन प्रमुख मार्ग जातात. दोन्ही मार्गांवर सतत अवजड वाहनांची ये- जा असते. त्यातच शहरातील व बाहेरील वाहनधारकांमुळे स्वा. सावरकर चौक, छत्रपती शिवाजी महाराज चौक, अंबाजोगाई रोडवर सतत वाहतूक ठप्प होत असते. त्यामुळे तब्बल दोन कि.मी.पर्यंत रांगा लागतात. त्यातच अहमदपूर- अंबाजोगाई मार्गाचे काम प्रगतिपथावर आहे. एका बाजूने रस्ता काम सुरू असतानाही ग्रामीण रुग्णालयासमोरील एक विद्युत खांब अद्यापही काढण्यात आला नाही. त्यामुळे वाहतुकीच्या कोंडीत आणखीन भर पडत आहे. परिणामी, पोलीस ठाण्यासमोर वाहनांच्या लांबच लांब रांगा लागत आहेत. याबाबत पोलीस प्रशासन व महामार्ग प्राधिकरणाने दुर्लक्ष केल्याचे दिसून येत आहे.

हा विद्युत खांब काढण्यासाठी महावितरण, महामार्ग प्राधिकरणाने अद्यापपर्यंत कुठलीही कार्यवाही केली नसल्याचे दिसून येत आहे. त्यातच शहरातील अनधिकृत वाहतुकीचे थांबे असून, तहसील कार्यालयासमोर तर वाहनांची मोठ्या प्रमाणावर गर्दी होत आहे. शहरातील दहा कि.मी.वरील वाहतूक सांभाळण्यासाठी एक पोलीस कॉन्स्टेबल आणि दोन होमगार्ड नियुक्त करण्यात आले आहेत. मात्र, बहुतांश वेळेस त्यांना काही जण जुमानत नसल्याचे पाहावयास मिळत आहे. त्यातच ऑटोरिक्षा व दुचाकीस्वार पुढे जाण्याच्या घाईमध्ये पूर्णत: रस्त्यावरील वाहतूक ठप्प करीत आहेत. याबाबत अहमदपूर शहर वाहतुकीसाठी स्वतंत्र व्यवस्था नसल्याचे सांगण्यात आले.

अवैध वाहतूक थांबे काढली जाणार

तहसील कार्यालयासमोर अनधिकृतरीत्या अनेक वाहते थांबतात. त्यामुळे वाहतूक ठप्प होत आहे. त्यामुळे पोलीस ठाण्यास सदरील थांबे रद्द करण्यासाठी आणि काढण्यासंदर्भात सूचना केली आहे.

-प्रसाद कुलकर्णी, तहसीलदार

ही समस्या विद्युत खांबामुळे

अंबाजोगाई रोडवरील ग्रामीण रुग्णालयसमोर एक विद्युत खांब असून, त्यावरून वीज प्रवाह चालू आहे. यासंबंधी महामार्ग प्राधिकरणाला वेळोवेळी सांगूनही तो काढला जात नाही. त्यामुळे रस्त्याचे काम अर्धवट राहिले आहे. याबाबत कार्यालय स्तरावरून पत्र दिले असून, लवकरच कारवाई करण्यात येईल.

-सुनील बिर्ला, पोलीस निरीक्षक