राजकुमार जाेंधळे, लातूर : शहरातील पाच नंबर चौक ते छत्रपती चौक या रिंग रोडवर रविवारी रात्री एका पोलिस कर्मचाऱ्याच्या दुचाकीला धडक दिली. या अपघातात कर्मचारी हा जखमी झाला असून, त्याला खासगी रुग्णालयात तातडीने उपचारासाठी दाखल करण्यात आले.
पोलिसांनी सांगितले, लातूर पोलिस दलात कार्यरत असलेला एक कर्मचारी दुचाकीवर रविवारी रात्री १० वाजण्याच्या सुमारास घराबाहेर पडला. पाच नंबर चौक ते खाडगाव दरम्यान एका चारचाकी वाहनाने धडक दिली. या अपघातात तो जखमी झाला आहे. या घटनेची माहिती एमआयडीसी पोलिसांना मिळाली. घटनास्थळी पोलिस तातडीने दाखल झाले आणि जखमी पोलिस कर्मचाऱ्याला एका खासगी रुग्णालयात उपचारासाठी दाखल केले. याबाबत रात्री उशिरापर्यंत एमआयडीसी पोलिस ठाण्यात कुठलीही नोंद करण्यात आली नव्हती. जखमी कर्मचारी चार्ली पथकातील असल्याचे सांगण्यात आले.
एमआयडीसी पोलिसांनी घटनास्थळी घेतली धाव...
लातुरातील पाच नंबर चौक ते छत्रपती चौक दरम्यान खाडगाव रिंग रोड परिसरात हा अपघात रविवारी रात्री १० वाजण्याच्या सुमारास झाला. याची माहिती मिळताच एमआयडीसी पोलिस घटनास्थळी धावले. त्यांनी जखमीला रुग्णालयात दाखल केले. - गोरख दिवे, पोलिस निरीक्षक एमआयडीसी ठाणे, लातूर