शिरूर अनंतपाळमध्ये ८७ शाळांचा बाला उपक्रमात सहभाग

जिल्हा परिषदेचे मुख्य कार्यकारी अधिकारी अभिनव गोयल यांनी बाला उपक्रम सुरू केला आहे. शाळेत येणाऱ्या विद्यार्थ्यांची शाळेच्या इमारतीवर नजर पडताच त्यातून त्याला गणित, विज्ञान, इंग्रजी यांसह सर्व विषयातील विषय ज्ञानावर आधारित संबोध लक्षात यावेत, खेळता खेळता शिक्षणाचे धडे मिळावेत, यासाठी उपक्रम राबविला जात आहे. तालुक्यातील जास्तीत जास्त शाळेत उपक्रम राबविण्यात यावा, असे आवाहन सीईओंनी केले होते. त्यानुसार पहिल्या टप्प्यात ३५ शाळांमध्ये बाला उपक्रम राबविण्यात आला आहे. त्यांची पूर्णत्वाकडे वाटचाल सुरू झाली आहे. त्यामुळे गटशिक्षणाधिकारी अनिल पागे यानी पंचायत समितीच्या सभागृहात शनिवारी मुख्याध्यापकांची कार्यशाळा घेऊन तालुक्यातील शंभर टक्के शाळेत बाला उपक्रमाची सुरुवात केली आहे. यावेळी विस्तार अधिकारी गोवर्धन चपडे, केंद्रप्रमुख शिवाजी एरंडे, विठ्ठल वाघमारे, सुनील सातपुते, फरीद हाशमी आदींची उपस्थिती होती.

शंभर टक्के सहभाग नोंदविणारा तालुका...

तालुक्यातील जिल्हा परिषदेच्या ६१ आणि खासगीच्या २६ अशा ८७ शाळेत बाला उपक्रमाची सुरुवात झाली आहे. ३५ शाळेत बाला उपक्रमाची पूर्णत्वाकडे वाटचाल सुरू झाली आहे. त्यामुळे शिरूर अनंतपाळ तालुक्यातील शंभर टक्के शाळा बाला उपक्रम राबविणारा जिल्ह्यातील पहिला तालुका ठरणार असल्याचे गटशिक्षणाधिकारी अनिल पागे यांनी सांगितले.