लातूरच्या निलेश गायकवाड यांची युपीएससी परीक्षेत दुस-यांदा भरारी

गतवर्षी त्यांची सरंक्षण सहायक नियंत्रकपदी नियुक्ती झाली होती. सध्या प्रशिक्षण सुरु असून, यावर्षी त्यांनी पुन्हा परीक्षा देऊन देशात ६२९ वी रँक मिळविली आहे. आयआयटी मुंबई येथून केमिकल इंजिनिअरिंगमध्ये बी.टेक आणि एम.टेक झाल्यानंतर त्यांनी बेंगलोर येथे एका कंपनीमध्ये सहायोगी कन्सलटंट म्हणून सेवेत असताना कतृत्वाच्या मर्यादा लक्षात आल्यानंतर ते युपीएससीकडे वळले आणि स्पर्धा परीक्षेत ते यशस्वी झाले. महाविद्यालयीन व शालेय जीवनात त्यांनी विविध स्पर्धांत सहभाग नोंदविला होता. राष्ट्रीय पातळीवरील प्रज्ञाशोध परीक्षा, शिष्यवृत्ती परीक्षा, होमीभाभा वैज्ञानिक परीक्षा, स्वंयअंध्ययन, सामान्य ज्ञान, गणित विषयातील वेगवेगळ्या स्पर्धेत ते चमकले होते. आता भारतीय प्रशासन सेवेच्या परीक्षेत ते दुस-यांदा यशस्वी झाले आहेत. वडील प्रा.डॉ. श्रीकांत गायकवाड, आई प्रा. अनिता गायकवाड, भाऊ शैलेश व शिक्षकांकडून मिळालेली प्रेरणा आणि मार्गदर्शन यामुळे हे यश मिळाले असल्याचे निलेश गायकवाड म्हणाले.