मुरुड ग्रामीण रुग्णालय ऑक्सिजन निर्मिती प्रकल्पासह सुसज्ज

मुरुड येथील ग्रामीण रुग्णालयाला आ. धिरज देशमुख यांच्या स्थानिक विकास निधीतून १० मल्टीपॅरा मॉनिटर, ५ ऑक्सिजन कॉन्सन्ट्रेटर, २ सिलिंडर ट्रॉली, २ ईसीजी मशीन, ४ संगणक, ४ प्रिंटर, १ पोर्टेबल एक्स-रे मशीन, ३ बायपॅप मशीन या वैद्यकीय साहित्याचे लोकार्पण करण्यात आले.

यावेळी आ. सतीश चव्हाण, आ. विक्रम काळे, मुख्य कार्यकारी अधिकारी अभिनव गोयल, जि.प. सदस्य दिलीप नाडे, विजय देशमुख, जिल्हा शल्यचिकित्सक डॉ. लक्ष्मण देशमुख, सर्जेराव मोरे, रविंद्र काळे, सुभाष काळे, मदन काळे, वैद्यकीय अधीक्षक सुनीता पाटील, सरपंच अभयसिंह नाडे, उपसरपंच आकाश कणसे, डाॅ. दिनेश नवगिरे, प्रवीण पाटील, डाॅ. ईश्वरप्रसाद चांडक, माधव शिंदे, ज्ञानेश्वर भिसे, जयश्री तवले आदी उपस्थित होते.

सक्षम आरोग्य यंत्रणा हे विकासाचे द्योतक...

सुपरस्पेशालिटी हॉस्पिटलमध्ये ज्या सुविधा असतात, त्याच सुविधा ग्रामीण भागात असाव्यात म्हणून स्थानिक विकास निधीतून उपलब्ध करून दिल्या आहेत. उपचारासाठी ग्रामस्थांना जिल्ह्याच्या ठिकाणी जाण्याची गरज भासणार नाही. मुरुड येथील ग्रामीण रुग्णालयाचा दर्जा वाढवून येथे १०० खाटांचे उपजिल्हा रुग्णालय व्हावे यासाठी पाठपुरावा करणार असून, आरोग्य यंत्रणा सक्षम करणे हे विकासाचे द्योतक असल्याचेही आ. देशमुख म्हणाले.