महात्मा फुले, सावित्रीबाई फुले हे कृतिशील समाजसुधारक

लातूर : एकोणिसाव्या शतकातील महात्मा ज्योतिबा फुले आणि सावित्रीबाई फुले हे कृतिशील समाजसुधारक होते. त्यांचे विचार आणि आचरण यामध्ये एकवाक्यता दिसून येते. त्यामुळेच त्यांना सेंद्रीय विचारवंत म्हणून संबोधले जाते, असे प्रतिपादन प्रा. डॉ. सुशीला पिंपळे यांनी येथे केले.

सावित्रीबाई फुले यांच्या १९० व्या जयंतीनिमित्त नारी प्रबोधन मंच, लातूर आयोजित ‘ज्योतिर्मय सावित्री : एक समताधिष्ठित सहजीवन’ या पुस्तकाच्या प्रकाशन समारंभात प्रमुख वक्त्या म्हणून त्या बोलत होत्या. यावेळी ज्येष्ठ साहित्यिक प्रा. डॉ. भास्कर बडे, डॉ. अजित जगताप, सुनंदा जगताप, नारी प्रबोधन मंचच्या अध्यक्षा सुमती जगताप, लेखिका अरुणा दिवेगावकर यांची प्रमुख उपस्थिती होती. यावेळी प्रा. पिंपळे म्हणाल्या, पुस्तकात समतेच्या संकल्पना अगदी सुस्पष्ट आहेत. खूप मोठ्या ग्रंथ संग्रहातून त्या नेमकेपणाने मांडल्या आहेत. या पुस्तकाचा आशय कुठेही ढळणार नाही, याची काळजी लेखिका दिवेगावकर यांनी घेतली आहे. तसेच ज्योतिबा आणि सावित्री यांचे समताधिष्ठित सहजीवन शोधण्याचा व्यापक प्रयत्न केला आहे. प्रा. बडे म्हणाले, ‘सावित्री आणि ज्योतिबा यांचे १९ व्या शतकातील आधुनिक विचार आजही पचवणे हे येरागबाळ्याचे काम नाही. त्यासाठी लोकशाही मूल्यांशी समर्पित राहावे लागते. या कार्यक्रमात प्रारंभी विविध क्षेत्रात उल्लेखनीय कामगिरी करणाऱ्या जोडप्यांचा सत्कार करण्यात आला.

कार्यक्रमाला लातूर वृक्ष चळवळ, मराठा साहित्य संस्कृती मंडळातील सदस्य, साहित्यिक, कथाकार, लेखक, कवी उपस्थित होते. प्रास्ताविक मयुरी सामंत, डॉ. अनिल जायभाये यांनी केले. सूत्रसंचालन प्रा. पंचशील डावकर यांनी केले तर प्रा. नयन राजमाने यांनी आभार मानले. कार्यक्रमाच्या यशस्वीतेसाठी प्रतिभा गोमसाळे, राधाकृष्ण देशमुख, सुनंदा जगताप, राहुल लोंढे, सुधाकर बुरगे, तारा लहाने, अखिलेश आयलाने, भीमराव गाडेराव, आम्रपाली बनसोडे यांनी परिश्रम घेतले.

कॅप्शन : लेखिका अरुणा दिवेगावकर लिखित ‘ज्योतिर्मय सावित्री : एक समताधिष्ठित सहजीवन’ या पुस्तकाचे प्रकाशन करताना साहित्यिक प्रा. डॉ. भास्कर बडे, डॉ. अजित जगताप, सुनंदा जगताप, नारी प्रबोधन मंचच्या अध्यक्षा सुमती जगताप.