२८ हजार हेक्टरवर होणार खरिपाचा पेरा

शिरूर अनंतपाळ तालुक्याचे भौगोलिक क्षेत्र ३१ हजार २०८ हेक्टर्स आहे. यापैकी लागवडीसाठी उपयुक्त असणारी जमीन २९ हजार ७०० हेक्टर्स आहे. ५ हजार हेक्टर्स बागायती जमीन असल्याने २८ हजार ५०० हेक्टर्सवर खरीप हंगामाची पेरणी करण्यात येते. यंदा पेरणीचा कृती आराखडा तालुका कृषी कार्यालयाकडून तयार करण्यात आला आहे. तालुक्यातील बहुतांश शेतकरी सोयाबीनचा पेरा करतात. सोयाबीन नगदी पीक आहे आणि यावर्षी सोयाबीनला सात हजार रुपये प्रति क्विंटल भाव मिळाला आहे. त्यामुळे जास्तीत जास्त शेतकरी सोयाबीनकडे वळले आहेत. परिणामी एकंदर लागवडी क्षेत्राच्या ८० टक्के क्षेत्रावर सोयाबीनची पेरणी होणार आहे. सोयाबीनचा पेरा २३ हजार ३८५ हेक्टर्सवर होणार असून, त्यासाठी १७ हजार ६२५ क्विंटल बियाण्याची गरज आहे. त्यामुळे बियाणे कंपन्यावर अवलंबून न राहता १३ हजार ५८८ क्विंटल घरगुती बियाण्याचा वापर करण्यात येणार आहे. केवळ ३०० क्विंटल बियाण्याची गरज बाजारपेठेतून भागविली जाणार असल्याचे कृषी विभागाच्या वतीने सांगण्यात आले.

२३ हजार ५०० हेक्टर्सवर सोयाबीन...

खरीप हंगामाच्या कृती आराखड्यातील २८ हजार ३८५ हेक्टर्सपैकी २३ हजार ५०० हेक्टर्सवर सोयाबीनचा पेरा करण्यात येणार आहे. उर्वरित ३ हजार ७५० हेक्टर्सवर तुर, तसेच ३३० हेक्टर्सवर उडीद, २१० हेक्टर्सवर मूग आणि १७५ हेक्टर्सवर हायब्रीड ज्वारीची पेरणी करण्यात येणार आहे.

३ हजार ४३९ मॅट्रिक टन खते उपलब्ध...

शिरूर अनंतपाळ तालुक्यातील खरीप हंगामाच्या पेरणीसाठी रासायनिक खतांची गरज लक्षात घेऊन तालुका कृषी कार्यालयाकडून खतांचा तुटवडा निर्माण होऊ नये यासाठी ३ हजार ४३९ मॅट्रिक टन रासायनिक खते उपलब्ध करण्यात आली आहेत. उर्वरित खताचे आवंटन मंजूर करण्यात आले असल्याचे तालुका कृषी अधिकारी संजय नाबदे, कृषी अधिकारी शिवप्रसाद वलांडे यांनी सांगितले.