रुग्णालाय इमारत उभारली, मात्र रिक्त पदाचा प्रश्न कायम

उदगीर, अहमदपूर, चाकूर व जळकोट या चार तालुक्यांच्या मध्यवर्ती ठिकाणी असलेले हंडरगुळी येथील प्राथमिक आरोग्य केंद्र. या चार तालुक्यांच्या मध्यवर्ती ठिकाणी असलेल्या हंडरगुळी येथील प्राथमिक आरोग्य केंद्रात उपचारासाठी दररोज १०० पेक्षा अधिक रुग्ण तर रविवारी आठवडी बाजार दिवशी १५० ते २०० रुग्ण तपासणीसाठी येतात. त्यामुळे येथील आरोग्य केंद्रावर रुग्णांचा भार आहे. यांची दखल घेऊन मोडकळीस व कालबाह्य झालेली इमारत पाडून नवीन देखणी इमारत आरोग्य विभागाकडून उभारण्यात आली; पण आता आरोग्य केंद्रात रिक्त असलेली पदे केव्हा भरणार? असा सवाल नागरिकांतून विचारला जात आहे.

हंडरगुळी प्राथमिक आरोग्य केंद्रांतर्गत हाळी, हंडरगुळी, वाढवणा खु. व तोंडार ही चार उपकेंद्रे असून कार्यक्षेत्रातील गावासह कार्यक्षेत्राबाहेरील गावातील रुग्णही येथे आरोग्य तपासणीसाठी येतात. त्यामुळे कर्मचाऱ्यांची आवश्यकता असणे गरजेचे आहे. सध्या वातावरणातील बदलामुळे सर्दी, ताप, खोकला, अंगदुखी आदी आजारांच्या रुग्णसंख्येत वाढ होत चालली आहे. त्यामुळे आजाराची थोडीही चाहूल लागताच नागरिक तपासणीसाठी दवाखान्यात दाखल होत आहेत. आरोग्य केंद्रात कर्मचाऱ्यांची कमतरता असून, रिक्त पदांविषयी वरिष्ठांना कळवले आहे, असे हंडरगुळी येथील वैद्यकीय अधिकारी डाॅ. प्रशांत गजाई यांनी सांगितले.

रुग्णालयातील कर्मचारीसंख्या...

हंडरगुळी येथील आराेग्य केंद्रात सध्याला वैद्यकीय अधिकारी - मंजूर पदे ०२, भरलेली पदे ०२, रिक्त पदे ००, आरोग्य सहायक (पुरुष) - मंजूर पदे १, भरलेली पदे ०१, रिक्त पदे ००, आरोग्य सहायक (स्त्री) - मंजूर पदे ०१, भरलेली पदे ०१, रिक्त पदे ००, औषध निर्माण अधिकारी - मंजूर पदे ०१, भरलेली पदे ००, रिक्त पदे ०१, आरोग्य सेवक - मंजूर पदे ०४, भरलेली पदे ०२, रिक्त पदे ०२, आरोग्य सहायक (पुरुष) - मंजूर पदे ०१, भरलेली पदे ०१, रिक्त पदे ०१, आरोग्य सेवक (महिला) - मंजूर पदे ०५ भरलेली पदे ०२, रिक्त पदे ०३, प्रयोगशाळा तंत्रज्ञ- मंजूर पदे ०१, भरलेली पदे ००, रिक्त पदे ०१ आहेत.