औसा येथे भीषण अपघात; बीएमडब्ल्यू कार एकाचवेळी ट्रक आणि कंटेनरला धडकली, कारमधील चौघे जागीच ठार

शुक्रवारी रात्री १०:१५ वाजता घटना : अपघातग्रस्त कार सांगली जिल्ह्यातील...

राजकुमार जोंधळे / लातूर

औसा (जि. लातूर) : औसा-तुळजापूर महामार्गावर शुक्रवारी रात्री १०.१५ वाजता तीन वाहनांचा विचित्र भीषण अपघात झाला. भरधाव बीएमडब्ल्यू कारने ट्रक आणि कंटेनरला जोराची धडक दिली. कारमधील चौघांचा जागीच मृत्यू झाला, तर दोघे गंभीर जखमी आहेत. हा अपघात एवढा भयानक होता की, महामार्गावर रक्ताचा सडा पडला आणि मानवी अवयवांचा अक्षरश: चेंदामेंदा झाला.

सांगली येथील कार (एमएच ०४ ईजी ७५००) काही कामानिमित्त लातूरला आली होती. काम आटोपल्यानंतर शिवली येथे जेवण केल्यानंतर सहकाऱ्याला सोडण्यासाठी ही कार औशाकडे येत होती. दरम्यान, औशानजीक एका हॉटेल समोर पुढे चाललेल्या लाकडाने भरलेल्या ट्रकला (एमएच २५ यू ०५२२) आणि एका कंटेनरला (एमएच १२ एफसी ७६४२) पाठीमागून जोरदार धडक दिली. धडक एवढी भीषण होती की, लाकडी ट्रक शंभर फूट पुढे जाऊन उलटला, तर कार पूर्णपणे चक्काचूर होऊन रस्त्यालगतच्या खड्ड्यात कोसळली.

अपघातात मृत्यू झालेले तिघे हे औसा तालुक्यातील बोरगाव (न.) येथील रहिवासी आहेत. चालक धनराज काशिनाथ जाधव (४९, रा. सांगली), आबासाहेब आप्पासाहेब साळुंके (३६), शुभम शेषेराव पाटील (२६), किसन रामलिंग साळुंके (४९, तिघेही रा. बोरगाव) यांचा जागीच मृत्यू झाला, तर अपघातात जयहिंद विश्वास जाधव (३०, रा. औसा) आणि विनायक श्रीकांत हालदर (२८, रा. सांगली) हे दोघे गंभीर जखमी झाले आहेत. त्यांच्यावर सध्या उपचार सुरू आहेत. घटनेची माहिती मिळताच औशाचे डीवायएसपी कुमार चौधरी, पोलिस निरीक्षक रेवण डमाले, फौजदार भाऊसाहेब माळवदकर यांच्यासह पोलिस कर्मचाऱ्यांनी घटनास्थळी धाव घेतली.

बोरगाववर पसरली शोककळा...

औसा ते तुळजापूर महामार्गावर रात्री झालेल्या भीषण विचित्र अपघातात बोरगाव येथील तिघांचा मृत्यू झाल्याची घटना घडली. या घटनेने बोरगाववर शोककळा पसरली आहे. औसा पोलिसात नोंद करण्याची प्रक्रिया रात्री उशिरापर्यंत सुरू होती.

युवकांशी व्यावसायिक मैत्री...

सांगली येथील धनराज जाधव हे व्यापारी होते. बोरगाव येथील तरुणांच्या मदतीने ते औसा तालुक्यासह जिल्ह्यात व्यवसायाचे जाळे निर्माण करीत होते. आज लातुरात कार खरेदी केल्यानंतर ते शिवलीकडे जेवणासाठी गेले. औसाकडे येताना हा भीषण अपघात झाला.