लातूर : समाजकल्याण विभागाने कर्मचाऱ्यांच्या हिताचे विविध निर्णय घेतले असून, त्यातून कर्मचाऱ्यांचे विविध प्रश्न प्राधान्याने मार्गी लावण्यात येत आहेत. विभागांमध्ये प्रशासकीय गतिमानता व सुधारणा करण्यासाठी विविध संवर्गातील अधिकारी, कर्मचारी यांच्यासाठी राज्य शासनाच्या यशदा आणि बार्टीच्या माध्यमातून प्रशिक्षणाचा कार्यक्रम हाती घेतला आहे. त्यासाठी राज्याचे समाजकल्याण आयुक्त डॉ. प्रशांत नारनवरे यांनी पुढाकार घेतला आहे. कोविड काळात ऑनलाईन पद्धतीने प्रशिक्षण लवकरच दिले जाणार आहे. स्पर्धा आणि तंत्रज्ञानाच्या युगात अधिकारी, कर्मचारी यांनीही काळानुसार आपल्या कामकाजात बदल करणे आवश्यक आहे. यासाठी तंत्रज्ञानाचा वापर करण्याबरोबरच प्रशिक्षणाची गरज असल्याने हा निर्णय घेण्यात आला आहे. कर्मचाऱ्यांच्या हिताला प्राधान्य देत विविध संवर्गातील निलंबित कर्मचाऱ्यांची सेवा प्रस्थापित केली आहे. यापूर्वीही ११ कर्मचाऱ्यांच्या सेवा आयुक्त प्रशांत नारनवरे यांच्या निर्णयाने पुनर्स्थापित करण्यात आल्या आहेत. तसेच अनुसूचित जाती-जमातीच्या मुला-मुलींच्या निवासी शाळेतील २१ कर्मचाऱ्यांच्या नियमित वेतनश्रेणीचा प्रश्नही मार्गी लावण्यात आला आहे.
कार्यक्षमता वाढविण्यासाठी प्रशिक्षण...
समाजकल्याण विभागाचे कामकाज अधिक गतिमान होण्यासाठी समाजकल्याण विभागाने कर्मचार्‍यांसाठी कौशल्य विकास, झिरो पेंडन्सी, विविध संवर्गाचे प्रशिक्षण यासारखे विविध उपक्रम राबविण्यात येत आहेत. त्याचबराेबर गेल्या अनेक वर्षांपासून निलंबित असलेल्या सर्व सेवा पुनर्स्थापित केलेल्या कर्मचाऱ्यांची कार्यक्षमता वाढविण्यासाठी त्यांना प्रशिक्षण देण्यात येणार असल्याचे आयुक्त डॉ. प्रशांत नारनवरे म्हणाले.