८ गावांचे ई-पीक पाहणीचे काम शंभर टक्के पूर्ण

तालुक्यातील कुमदाळ, बामाजीचीवाडी, खेर्डा, मुत्तलगाव, धडकनाळ, अनुपवाडी, तादलापूर, तिवटग्याळ या आठ गावांतील शेतकऱ्यांनी ई-पीक प्रणालीचा वापर करून संपूर्ण माहिती अपलोड केली आहे. एकूण ६२ हजार ५२५ शेतकऱ्यांपैकी २८ हजार १४७ शेतकऱ्यांनी या प्रणालीचा वापर करून आपल्या शेतातील पीक, झाड, विहिरी, बोअर आदींची नोंद केली आहे. अद्याप तालुक्यातील ३४ हजार ३७८ शेतकऱ्यांनी या ॲपद्वारे नोंदणी केली नाही. त्या अनुषंगाने तालुक्यातील मंडळ अधिकारी ई-पीक पाहणी करून घेत आहेत. प्रत्येक दोन मंडळांस एक नायब तहसीलदाराची नियुक्ती करण्यात आली आहे. स्वतः उपविभागीय अधिकारी व तहसीलदार गावात जाऊन प्रणालीबाबत शेतकऱ्यांना मार्गदर्शन करून पाठपुरावा करीत आहेत.

उदगीर तालुक्यातील मंडळ अधिकारी, मंडळ कृषी अधिकारी, तलाठी, कृषी साहाय्यकांची बैठक घेऊन त्यानुसार पुढील सात दिवसांत सर्व कर्मचाऱ्यांनी आपल्या मंडळात हजर राहून पीक पाहणीचे काम पूर्ण करण्याबाबत सूचना करण्यात आल्या आहेत. उर्वरित शेतकऱ्यांनी आपल्या पिकांची नोंद प्रणालीद्वारे अपलोड करण्याचे आवाहन तहसीलदार रामेश्वर गोरे यांनी केले आहे.

याबाबत जिल्हाधिकारी पृथ्वीराज बी.पी. यांच्या मार्गदर्शनाखाली अप्पर जिल्हाधिकारी डॉ. अरविंद लोखंडे यांना उदगीरचे नोडल अधिकारी म्हणून नियुक्त केले आहे. त्यांच्या मार्गदर्शनानुसार तालुक्यात उर्वरित सात दिवसांत काम करण्यात येत असल्याचे तहसीलदार गोरे यांनी सांगितले.