शाळेच्या जुन्या भिंतीना कॉलमचा आधार !

केळगाव : निलंगा तालुक्यातील खडक उमरगा येथील जिल्हा परिषद शाळेच्या इमारतीस पावसाळ्याच्या दिवसांत गळती लागत असल्याने विद्यार्थ्यांची अडचण होत होती. दरम्यान, प्रशासनाने शाळादुरुस्तीस सुरुवात केली आहे. मात्र, जुन्या भिंतीना सिमेंटच्या कॉलमचा आधार दिला जात आहे. त्यामुळे पालकांतून नाराजी व्यक्त होत आहे.

खडक उमरगा येथे जिल्हा परिषद शाळा आहे. या शाळेची इमारत ही जवळपास १९९० ते ९३ च्या कालावधीत बांधण्यात आली आहे. हे काम चांगल्या दर्जाचे न झाल्याने पावसाळ्यात इमारतीच्या छतास गळती लागत आहे. त्यामुळे पावसाळ्याच्या दिवसांत विद्यार्थ्यांना बसण्यासाठीही जागा शिल्लक राहत नाही. परिणामी, शाळेसाठी नवीन इमारत बांधकाम करण्यात यावे, अशी मागणी सातत्याने करण्यात येत होती.

शाळेच्या इमारतीची ही दुरवस्था पाहून प्रशासनाने दुरुस्तीचे काम हाती घेतले आहे. परंतु, इमारतीच्या भिंती न पाडता त्या ठिकाणीच सिमेंट काँक्रीटचे कॉलम उभारण्यात येत आहेत. भिंती जुन्या असल्याने त्या काढून नवीन बांधकाम करण्यात यावे, अशी मागणी गावातील धनाजी ढोकरे, उद्धव भुरे, तुकाराम कदम, महादेव कदम, शिवराज ढोकरे, अनिल पाटील, अंगद सुरवसे, आदींनी केली आहे.

शाळा पाच-सहा वर्षांपासून पावसाळ्यात गळत होती. शाळेच्या इमारतीच्या स्लॅबच्या भिंती भिजून गुळगुळीत झाल्या आहेत. सध्या शालेय विभागाच्या वतीने जुन्या भिंती ठेवून नवीन कॉलम टाकून काम करण्यात येत आहे. त्यामुळे धोका होण्याची भीती नाकारता येत नाही, असे शालेय व्यवस्थापन समितीचे अध्यक्ष बाळासाहेब चव्हाण यांनी सांगितले.

निधी कमी असल्याने शाळेच्या जुन्या भिंती ठेवून चार वर्गखोल्यांवर नवीन कॉलम उभारून छत टाकण्यात येत आहे. नवीन इमारतीसाठी प्रशासनाकडे पाठपुरावा करण्यात येत आहे, असे गटशिक्षणाधिकारी संतोष स्वामी यांनी सांगितले.