नळेगावात जिल्हा बँक फोडण्याचा प्रयत्न

नळेगाव (जि. लातूर) : चाकूर तालुक्यातील नळेगाव येथील लातूर जिल्हा मध्यवर्ती बँकेची शाखा गॅस कटरच्या सहाय्याने फोडून चोरी करण्याचा प्रयत्न चोरट्यांनी केल्याची घटना सोमवारी सकाळी उघडकीस आली आहे. याप्रकरणी चाकूर पोलीस ठाण्यात गुन्हा दाखल करण्यात आला आहे.

नळेगाव येथे लातूर जिल्हा मध्यवर्ती सहकारी बँकेची शाखा आहे. नेहमीप्रमाणे शनिवारी बँक बंद करण्यात आली. दरम्यान, शनिवारी रात्री ते सोमवारी पहाटेपर्यंतच्या कालावधीत चोरट्यांनी बँकेच्या उत्तर बाजूला असलेल्या खिडकीचा लोखंडी गज गॅस कटरच्या सहाय्याने कापून आत प्रवेश केला. त्यानंतर बँकेच्या खोलीचा दरवाजाही गॅस कटरच्या सहाय्याने कापला आणि बँकेच्या मुख्य खोलीत जाण्याचा प्रयत्न केला. मात्र, चोरट्यांना त्यात यश आले नाही.

नेहमीप्रमाणे सोमवारी सकाळी बँकेचे सेवक कमलाकर देशमुख यांनी बँकेचा मुख्य दरवाजा उघडून आतमध्ये प्रवेश केला, तेव्हा त्यांना चोरी करण्याचा प्रयत्न झाल्याचे दिसून आले. त्यामुळे त्यांनी ही माहिती वरिष्ठांना कळवली. बँकेचे शाखाधिकारी लिंबाजी मस्के यांच्या फिर्यादीवरून चाकूर पोलीस ठाण्यात चोरट्यांविरुद्ध गुन्हा दाखल करण्यात आला आहे. अधिक तपास पोलीस हेडकाॅन्स्टेबल डी. टी. शिरसाट करत आहेत.

सोबतचे साहित्य टाकले बँकेत...

चोरटे बँक फोडण्यासाठी सोबत आणलेली गॅसची टाकी, छोटे गॅस सिलिंडर, गॅस कटर, मोठे लोखंडी रॉड व इतर साहित्य बँकेतच टाकून पसार झाले. घटनास्थळाला पोलीस निरीक्षक बालाजी मोहिते यांनी भेट देऊन पाहणी केली.

श्वानपथक दाखल...

यातील चोरट्यांचा माग काढण्यासाठी पोलिसांनी सोमवारी दुपारी घटनास्थळी श्वानपथकाला पाचारण केले. यावेळी श्वानांनी मुख्य रस्त्यापर्यंत मार्ग दाखवला. ठसे तज्ज्ञांनाही पाचारण करण्यात आले होते.