कोविड संसर्ग रोखण्यासाठी एसटीचे विषाणूरोधक निर्जंतुकीकरण

अहमदपूर : कोरोनाच्या प्रादुर्भावामुळे दीड वर्षांपासून सर्व उद्योग व्यवसायांवर मोठा परिणाम झाला आहे. खासगी, सार्वजनिक वाहतूकसेवाही अडचणीत आली आहे. एकमेकांच्या संपर्कातून कोविडचा संसर्ग होत असल्याने एसटी महामंडळाने निर्जंतुकीकरण मोहीम राबविण्यास सुरुवात केली आहे. जिल्ह्यातील अहमदपूर आगारात प्रथमच ॲन्टी मायक्रोबायल ट्रिटमेंटमार्फत निर्जंतुकीकरण करण्यात येत आहे.

कोविडमुळे एसटी महामंडळास मोठा फटका बसला आहे. संसर्गाच्या भीतीने प्रवासी प्रवास करणे टाळत आहेत. अत्यावश्यक कामाशिवाय नागरिक प्रवास करीत नाहीत. सध्या कोरोनाचा प्रादुर्भाव कमी झाला आहे. हा संसर्ग कमी व्हावा म्हणून एसटी महामंडळाने ॲन्टी मायक्रोबायल ट्रिटमेंटमार्फत अहमदपूर आगारातील ५५ बसचे निर्जंतुकीकरण करण्यास सुरुवात केली आहे. त्यामुळे प्रवाशांना मोठा दिलासा मिळाला आहे. अशा प्रकारे निर्जंतुकीकरण करण्यात येत असल्याने सर्व प्रकारचे विषाणू नष्ट होतात, असे कंपनीच्या प्रकल्पाचे संचालक जितेंद्र शर्मा यांनी सांगितले.

विषाणूरोधक कोटिग करून बस निर्जंतुकीकरण करण्यात येत आहे. या प्रकारामुळे बॅक्टेरिया, व्हायरस आणि फंगस नष्ट होतात. त्यामुळे बसेस सुमारे दोन महिने विषाणूमुक्त राहतात, असेही ते म्हणाले.

प्रायोगिक तत्त्वावर उपक्रम...

कोरोना विषाणू रोधक कोटिंगमुळे सर्व प्रकारचे बॅक्टेरिया, व्हायरस आणि फंगस नष्ट होतात. त्यामुळे या बसेस सुमारे दोन महिने विषाणूमुक्त राहातात. तिसऱ्या लाटच्या पार्श्वभूमीवर एसटी महामंडळाकडून ही खबरदारी घेत जात आहे. कोरोनापासून प्रवाशांचा बचाव करण्यासाठी एसटी महामंडळाकडून प्रायोगिक तत्त्वावर अहमदपूर आगारातील ५५ बसेसचे निर्जंतुकीकरण करण्यात येत आहे, अशी माहिती आगार व्यवस्थापक एस.जी. सोनवणे यांनी दिली.