अंगणवाडी सेविका नॉट रिचेबल; ऑफलाईन अहवालाचा ताण वाढला

पोषण ट्रॅकर ॲप इंग्रजीत असल्याने अंगणवाडी सेविकांना त्यावर कामकाज करणे अडचणीचे जात आहे. त्यामुळेच अंगणवाडी सेविकांच्या संघटनेने मोबाईल परत करण्याचे सत्र सुरू ठेवली आहे.आतापर्यंत ६० ते ६५ टक्के अंगणवाडी सेविकांनी मोबाईल परत केले आहेत. लातूर जिल्ह्यामध्ये २४०८ अंगणवाड्या आहेत. त्या अंगणवाड्यामध्ये अंगणवाडी सेविका आणि मदतनीस म्हणून तीन हजार पाचशे जणी काम करतात. अंगणवाडी सेविकांना दिलेल्या पोषण अहवालात स्तनदा माता, गरोदर माता, बालकांचे वजन, उंची आदी बाबतची माहिती भरून शासनाला द्यावी लागते. मात्र शासनाने दिलेल्या मोबाईलची रॅम कमी आहे. एवढेच नाही तर नवीन ॲप डाऊनलोड होत नाहीत. त्यामुळे पोषण ट्रॅकर ॲप नावाला झाले आहे. शिवाय,ॲप इंग्रजीत असल्यामुळे अंगणवाडीसेविकांना त्यात माहिती भरणे अडचणीचे ठरत आहे. याच कारणामुळे अनेक अंगणवाडी सेविकांनी मोबाईल परत केले आहेत. त्यामुळे या अंगणवाडी सेविकांना आता ऑफलाईन नोंदी ठेवाव्या लागत आहेत.

असून अडचण नसून खोळंबा.....

२०१९ मध्ये मोबाईल दिल्या आहेत. या मोबाईलची रॅम कमी आहे. त्यामुळे ॲप डाऊनलोड करून घेता येत नाहीत. पोषण ट्रॅकरही इंग्रजीत आहे. त्यामुळे मोबाईल असून अडचण नसून खोळंबा आहे. २०१९ मध्ये दिलेले मोबाईल अनेकांचे नादुरुस्त झाले आहेत.त्याच्या दुरुस्तीची तरतूद महिला व बालकल्याण विभागाकडे नाही.त्यापेक्षा पेपर वरच कामकाज चांगले म्हणून आम्ही मोबाइल परत केले असल्याचे अनेक अंगणवाडी सेविकांनी सांगितले. स्थानिक मोबाईल रिपेअर करणाऱ्या दुकानदारांकडेही हे मोबाईल दुरुस्त होत नाहीत. त्यामुळे स्वतःच्या मोबाईलवरून काम केलेले बरे,असे काही अंगणवाडी ताई म्हणाल्या.

म्हणून केला मोबाईल परत....

पूर्वी दिलेल्या मोबाईल मध्ये कॅश नावाचे ॲप होते. त्या ॲप मध्ये प्रादेशिक भाषा निवडण्याची सोय होती.

पोषण ट्रॅकर ॲप मध्ये भाषा निवडण्याची सोय नाही. त्यात मराठी करता येत नाही. इंग्रजीत करावे लागते. दुरुस्तीसाठी शासनाकडून पैसे मिळाले नाहीत. मोबाईल खराब झाल्यामुळे परत केलेले आहेत.