७ हजार ९६१ जणांनी घेतली काेविड लस

जळकोट तालुक्यात कोरोनाचा संसर्ग वाढला होता. तो रोखण्यासाठी प्रशासनाकडून प्रतिबंधात्मक उपाययोजना करण्यात येत आहेत, तसेच कोविड रुग्णांना तात्काळ उपचार मिळावेत म्हणून प्रयत्न करण्यात येत आहेत. तालुक्यात कोविड लसीकरणाचे प्रमाण वाढावे म्हणून महसूल, पंचायत समिती, पोलीस प्रशासनाच्या वतीने वारंवार जनजागृती करण्यात आली, तसेच आरोग्य उपसंचालक डॉ. एकनाथ माले, ग्रामीण रुग्णालयाचे वैद्यकीय अधीक्षक डॉ. जगदीश सूर्यवंशी, तालुका वैद्यकीय अधिकारी डॉ. संजय पवार यांनीही जनजागृती करून आवाहन केले होते.

जळकोटसह तालुक्यातील वांजरवाडा, अतनूर या तिन्ही ठिकाणी कोविड लसीकरण वाढावे म्हणून तहसीलदार संदीप कुलकर्णी, गटविकास अधिकारी चंद्रहार ढोकणे, नगरपंचायतीच्या मुख्याधिकारी उज्ज्वला शिंदे, डॉ. जगदीश सूर्यवंशी, डॉ. संजय पवार यांनी शहर, गावांत फिरून मोठ्या प्रमाणात जनजागृती केली होती. दरम्यान, संसर्ग रोखण्यासाठी कोविड चाचण्या वाढविण्याच्या सूचना अप्पर जिल्हाधिकारी अरविंद लोखंडे, उपजिल्हाधिकारी प्रवीण मेंगशेट्टी यांनी वेळोवेळी बैठका घेऊन केल्या होत्या. त्यामुळे लसीकरणाचे प्रमाण वाढल्याचे दिसून येत आहे.

१ हजार ४६ जणांनी घेतले दोन्ही डोस...

तालुक्यातील ६ हजार ९१५ जणांनी कोविडचा पहिला डोस घेतला आहे, तसेच १ हजार ४६ जणांनी कोविडचा दुसरा डोस घेतला आहे. या सर्वांना कुठलाही त्रास जाणवला नाही. त्यामुळे लसीकरणास पात्र असलेल्या सर्वांनी लवकरात लवकर लसीकरण करून घ्यावे. त्यासाठी ऑनलाइन नोंदणी करावी, असे आवाहन डॉ. जगदीश सूर्यवंशी यांनी केले आहे.

सध्या जळकोट तालुक्यात कोरोनाचा संसर्ग कमी झाला आहे. काही बाधित गृहविलगीकरणात आहेत. ते आरोग्य विभागाने लागू केलेल्या नियमांचे पालन करीत आहेत. संसर्ग वाढू नये म्हणून प्रशासनाच्या वतीने प्रतिबंधात्मक उपाययोजना राबविण्यात येत आहेत. सर्वांनी शासन नियमांचे पालन करावे, असे आवाहन केले आहे.