Latest Marathi News | Breaking News in Marathi | Live News in Marathi | Marathi News Headlines | लोकमत ताज्या बातम्या | मराठी बातम्या | ताज्या मराठी बातम्या लाईव्ह | मराठी लेटेस्ट न्यूज

अमेरिकेने रात्री इराणमधील तीन प्रमुख अणुकेंद्रांवर जोरदार हल्ला केला होता. या हल्ल्यात इस्राइलच्या अणुकार्यक्रमाची जबर हानी झाल्याचा दावा अमेरिकेने केला आहे. तर या हल्ल्यात किरकोळ नुकसान झाल्याचे इराणने म्हटले आहे. मात्र या हल्ल्यामुळे इराणला जबर धक्का बसला असून, आता इराण या हल्ल्याचा बदला कसा घेऊ शकतो, याबाबत संरक्षण क्षेत्रामधून वेगवेगळे तर्कवितर्क लढवले जात आहेत. दरम्यान, इराणने आज इस्राइलमधील विविध शहरांवर जोरदार क्षेपणास्त्र हल्ले सुरू केले आहेत. आता इराणचे हे हल्ले केवळ इस्राइलपुरतेच मर्यादित राहणार की अमेरिकेलाही इराण लक्ष्य करणार याबाबत वेगवेगळे दावे केले जात आहेत.अमेरिकेच्या हल्ल्यानंतर इराणचे परराष्ट्रमंत्री अब्बास अरागची यांनी सांगितले की, आज सकाळी जे काही घडले ते अत्यंत खतरनाक आहे, तसेच गुन्हेगारी कृत्य आहे. याचा परिणाम कायम राहणार आहे. तसेच त्यासाठी जगातील प्रत्येक देशाने चिंता केली पाहिजे. संयुक्त राष्ट्रांच्या जाहीरनाम्याप्रमाणे आम्हाला आत्मसंरक्षणाचा अधिकार आहे. आम्ही आमचे नागरिक आणि देशाच्या सार्वभौमत्वासाठी आणि त्याच्या हितांच्या रक्षणासाठी प्रत्येक पर्यायाची निवड करू.दरम्यान, इराणमधील अणुकेंद्रांवर अमेरिकेने हल्ला केल्यानंतर इराण मध्य पूर्वेतील अमेरिकेच्या हवाई तळांना लक्ष्य करू शकतो, अशी शंका व्यक्त केली जात आहे. या युद्धामध्ये अमेरिका सहभागी झाल्याने मध्य पूर्वेमध्ये अमेरिकेचे हवाई तळ इराणचे प्राथमित लक्ष्य असू शकतात, असा संरक्षण तज्ज्ञांचा अंदाज आहे. मध्य पूर्वेमध्ये अमेरिकेचे अनेक हवाई तळ आहेत. त्या माध्यमातून अमेरिका या भागावर आपलं वर्चस्व ठेवून आहे.त्याबरोबरच इराण लेबेनॉनमधील हिजबुल्ला, येमेनमधील हुती, गाझा पट्टीमधील हमास आदी आपल्या समर्थित गटांच्या माध्यमातून अमेरिका आणि इस्राइलवर हल्ले करू शकतो, असाही दावा केला जात आहे. त्यामुळे मध्यपूर्वेतील तणाव आणखीनच वाढू शकतो.त्याशिवाय इराणकडून रणनीतिक आणि व्यापारीदृष्ट्या महत्त्वपूर्ण होर्मुझच्या आखातामध्ये नाविक कारवाई करून नाकेबंदी केली जाऊ शकते. त्यामुळे येथून होणारी मालवाहतूक अडचणीत येऊ शकते. होर्मुझच्या आखातामधून जगातील एकूण तेलवाहतुकीपैकी २० टक्के तेलाची वाहतूक होते.