Latest Marathi News | Breaking News in Marathi | Live News in Marathi | Marathi News Headlines | लोकमत ताज्या बातम्या | मराठी बातम्या | ताज्या मराठी बातम्या लाईव्ह | मराठी लेटेस्ट न्यूज

पुणे : भाजपचे पुणे शहर सरचिटणीस प्रमोद काेंढरे यांनी महिला पोलीस अधिकाऱ्याचा विनयभंग केल्याचा आरोप आहे. त्यामुळे कोंढेरे यांनी स्वतः या प्रकरणाची चौकशी पूर्ण होईपर्यंत सगळ्या पदातून मुक्त करा, अशी मागणी केली होती. त्यानुसार त्यांनी पक्षाकडे राजीनामा दिला असून तो स्वीकारण्यात आल्याचे भाजपचे शहराध्यक्ष धीरज घाटे यांनी सांगितले.तर भाजपच्या महिला आघाडीच्या प्रदेशाध्यक्ष चित्रा वाघ यांनी आमच्या पक्षाच्या का असेना पण कोंढरे याला कठोरात कठोर शिक्षा व्हावी यासाठी पाठपुरावा करणार असल्याचे सांगून घराचा आहेर दिला आहे. भाजप पदाधिकाऱ्याचा माज उतरवू, अशी टीका शिवसेनेच्या शिंदे गटाने केली आहे. काँग्रेसने या घटनेचा निषेध केला असून नालायक भाजपा व पोलिस प्रशासनाविरुद्ध गणपती बाप्पालाच निवेदन देण्यात येणार आहे.केंद्रीय मंत्री नितीन गडकरी यांच्या शनिवारवाड्याजवळ कार्यक्रमाच्या वेळी हा सर्व प्रकार घडला. प्रमोद कोंढरे यांच्यावर गुन्हा दाखल होऊन त्यांना अटक झाली आहे. या सर्व पार्श्वभूमीवर भाजपचे शहराध्यक्ष धीरज घाटे म्हणाले, प्रमोद कोंढेरे यांनी स्वतः या प्रकरणाची चौकशी पूर्ण होईपर्यंत मला सगळ्या पदातून मुक्त करा, अशी मागणी करून शहर सरचिटणीस पदाचा राजीनामा दिला आहे. हा राजीनामा आम्ही स्वीकारला आहे. या सगळ्या प्रकरणी पोलीस प्रशासन योग्य ती चौकशी करेल. चौकशीच्या नंतर जे काही निष्कर्ष निघतील. त्या निष्कर्षानंतर भाजप योग्य ती कारवाई करेल. या कार्यक्रमाला मी नव्हतो. मात्र तिथे गर्दी होती त्यामुळे अनवधानाने हे घडलं आहे का याची माहिती घ्यावी लागेल, असेही घाटे यांनी सांगितले. कठोरात कठोर शिक्षा होण्यासाठी पाठपुरावा करणार, चित्रा वाघ यांचा घरचा आहेरभाजप हा संविधान, कायदा आणि महिलांच्या सन्मानावर विश्वास ठेवणारा पक्ष आहे. कोणत्याही परिस्थितीत, महिला सशक्ततेविरुद्ध मग तो आमच्या पक्षाचा का असेना वागणाऱ्याला कधीही माफ केले जाणार नाही. प्रमोद काेंढरे याला कठोरात कठोर शिक्षा व्हावी. यासाठी पाठपुरावा करणार आहे, अशा शब्दात भाजपच्या महिला आघाडीच्या प्रदेशाध्यक्ष चित्रा वाघ यांनी घरचा आहेर दिला आहे.भाजपा पदाधिकाऱ्याचा माज उतरवूभाजपचे पदाधिकारी प्रमोद कोंढरे यांचा तीव्र निषेध आम्ही करीत असून, कोंढरे यांना आलेला सत्तेचा माज आम्ही निश्चित उतरवू, अशी टीका शिवसेनेच्या शिंदे गटाचे महानगरप्रमुख माजी आमदार रवींद्र धंगेकर यांनी केली. महाराष्ट्रात युतीचे सरकार आहे त्याचे आम्हाला भान आहे. यापूर्वी देखील कोंढरे याने राष्ट्रवादी काँग्रेसच्या वैशाली नागवडे यांचाही विनयभंग केला होता आणि त्याचा गुन्हा ही नोंदवण्यात आला आहे. स्त्रीलंपट प्रमोद कोंढरेसारख्या पदाधिकाऱ्याला, मित्रपक्ष भाजपने पक्षातून त्वरित काढून टाकावे, अशी मागणीही धंगेकर यांनी केली.नालायक भाजपा, पोलिस प्रशासनाविरुद्ध गणपती बाप्पालाच निवेदन देणारभाजप पदाधिकारी ओंकार कदम याने महापालिकेतील महिला अधिकाऱ्याचा विनयभंग करून धमकी दिली होती. त्यावेळी ही पोलिस प्रशासनाने फक्त तोंडदेखली कार्यवाही केली होती. भाजपचे पदाधिकारी प्रमोद काेंढरे याने महिला पोलिस अधिकाऱ्याचा विनयभंग केला आहे. त्यामुळे शहर काँग्रेसच्या वतीने येथे गुरुवारी नालायक भाजपा आणि पोलिस प्रशासनाविरुद्ध गणपती बाप्पालाच निवेदन देण्यात येणार आहे, असे काँग्रेसचे शहराध्यक्ष अरविंद शिंदे यांनी सांगितले.