Latest Marathi News | Breaking News in Marathi | Live News in Marathi | Marathi News Headlines | लोकमत ताज्या बातम्या | मराठी बातम्या | ताज्या मराठी बातम्या लाईव्ह | मराठी लेटेस्ट न्यूज

- दुर्गेश मोरेपुणे : ज्येष्ठ नेते शरद पवार यांना मुरब्बी राजकारणी आणि भाकरी फिरवणारा नेता म्हणून ओळखले जाते. नुकत्याच झालेल्या लोकसभा निवडणुकीमध्येही त्यांनी अशी काही भाकरी फिरवली की विरोधकांची दाणादाण झाली. विशेष म्हणजे पुणे जिल्हा कोणाचा, अशीही चर्चा सुरू होती. लोकसभेच्या निकालानंतर पुणे जिल्हा अजित पवार नव्हे तर शरद पवारांचाच असल्याचे सिद्ध झाले. या महत्त्वपूर्ण घडामोडीनंतर स्थानिक स्वराज्य संस्थांच्या पदाधिकाऱ्यांची चलबिचल वाढली आहे. जिल्हा परिषदेच्या राष्ट्रवादी काँग्रेसच्या ४४ सदस्यापैंकी बहुतांश सदस्य अजित पवार गटात होते. मात्र, आता हेच सदस्य शरद पवार गटात येण्यासाठी चुळबुळ करू लागल्याचे दिसत आहे.पक्षात फूट, नवे चिन्ह, केवळ एकच आमदार साथीला अशा परिस्थितीतही राष्ट्रवादीपासून दुरावलेल्यांची पुन्हा नव्याने मोट बांधत काँग्रेससह घटकपक्षांच्या मतदीने शरद पवार यांनी महायुतीला नामोहरण केले. संपूर्ण देशाचे लक्ष लागलेल्या बारामती लोकसभा मतदारसंघात सुप्रिया सुळे यांचा एक लाख ५८ हजार मतांनी विजय झाला. गेल्या निवडणुकीतील मताधिक्यात यावेळी वाढ झाल्याचे दिसले. त्यामुळे पूर्वी बारामती अजित पवारांची पॉवर असल्याचे जे बोलले जात होते ते आता बंद झाले आहे. विशेष म्हणजे याचा परिणाम स्थानिक स्वराज्य संस्थांमधील पदाधिकाऱ्यांवर झाला आहे. जिल्हा परिषदेमध्ये राष्ट्रवादी काँग्रेसचे ४४, काँग्रेस ७, शिवसेना १३ भाजप ७, अपक्ष १, रासप १, लो. क्रा.आ. १ असे ७५ सदस्य आहेत. शिवसेना आणि राष्ट्रवादीत फूट पडल्यानंतर अनेक सदस्य शिवसेनेच्या एकनाथ शिंदे गटात, तर राष्ट्रवादीतील अजित पवार गटात सहभागी झाले. काहींनी भाजपची कास धरली, तर भाजपमधील काहींनी शरद पवार गटाला साथ दिली.लोकसभा निवडणुकीत जिल्ह्यातील शरद पवार गट कमकुवत जाणवत होता. जिल्हा परिषदेचे सदस्य कधी शरद पवारांकडे तर कधी अजित पवारांकडे ये-जा करत होते. दरम्यान, अजित पवार यांनी सदस्यांना स्पष्ट भूमिका घ्यायला लावली. त्यामुळे बहुतांश सदस्य अजित पवार गटात राहिले. दुसरीकडे शरद पवारांनी आपली भाकरी फिरवण्यास सुरुवात केली. त्याचा परिपाक म्हणजे सुप्रिया सुळेंचा विजय. या विजयामुळे जनतेची सहानुभूती शरद पवार गटाला असल्याचे स्पष्ट झाले. त्यामुळे आगामी राजकीय समीकरणे पूर्णपणे बदलल्याने अनेक जिल्हा परिषद सदस्य आता शरद पवार गटात जाण्यास चुळबुळ करू लागले आहेत.दौंडच्या राणी शेळके सुळेंच्या भेटीलायवत येथील ग्रामदैवत श्री काळभैरवनाथ मंदिरात खासदार सुप्रिया सुळे यांच्या सत्काराचे आयोजन करण्यात आले होते. या कार्यक्रमाला जिल्हा परिषदेच्या माजी महिला व बालकल्याण सभापती राणी शेळके यांनी उपस्थिती लावली. यामुळे सर्वांच्याच भुवया उंचावल्या. कारण लोकसभा निवडणुकीत राणी शेळके यांनी अजित पवार गटाचे काम केले होते. निकालानंतर थेट खा. सुळेंच्या भेटीला आल्याने तालुक्यात उलटसुलट चर्चा सुरू झाली आहे. दरम्यान राणी शेळके यांच्याशी ‘लोकमत’ने संवाद साधला असता त्या म्हणाल्या, मी पहिल्यापासून राष्ट्रवादीतच आहे. मात्र, आपण निवडणुकीत अजित पवार गटाचा प्रचार करत होता आणि आज इकडे, असा प्रश्न उपस्थित करताच शेळके थोड्या गडबडल्या. खा. सुळे यांचे अभिनंदन करण्यासाठी आले असल्याचे सांगत कार्यक्रमस्थळावरून शेळके यांनी काढता पाय घेतला.जुन्यांचे पुनर्वसन की नव्यांना संधीपक्षफुटीनंतर पत्रकारांशी बोलताना खा. सुप्रिया सुळे यांनी आमदारकीपासून ते सोसाटीपर्यंत सर्व निवडणुका लढवणार असल्याचे सुतोवाच केले होते. आता तर जनतेचे वारे शरद पवारांच्या बाजूने आहे. हे स्पष्ट झाल्याने शरद पवार गटात इनकमिंगचे वेटिंग वाढू लागले आहे. आगामी काळातील राजकारणात तारले जावे यासाठी ही धडपड सुरू असली तरी ज्या पदाधिकारी आणि कार्यकर्त्यांनी सुरुवातीपासून ते नुकत्याच झालेल्या निवडणुकीतही शरद पवारांची साथ सोडली नाही, अशा जुन्यांचे येत्या काळात पुनर्वसन होणार की गटात येणाऱ्या नव्यांना संधी मिळणार, याकडे सर्वांचे लक्ष लागले आहे. मात्र, शरद पवार यावर काय भूमिका घेतात, हेही तितकेच महत्त्वाचे आहे.