अल्पवयीन मुलीच्या विनयभंगप्रकरणी लाटेवाडीतील युवकास तीन वर्षे सक्तमजुरी

कोल्हापूर : एकतर्फी प्रेमातून अल्पवयीन मुलीचा विनयभंग केल्याप्रकरणी भुदरगड तालुक्यातील लाटेवाडी येथील युवकास तीन वर्षे सक्तमजुरी व दहा हजार रुपये दंडाची शिक्षा सुनावली. सागर विलास परीट (वय २८) असे शिक्षा झालेल्या आरोपीचे नाव आहे. विशेष जिल्हा न्यायाधीश ए. एस. महात्मे यांनी सोमवारी ही शिक्षा ठोठावली. सरकारतर्फे सरकारी वकील अमिता कुलकर्णी यांनी काम पाहिले.

खटल्याची थोडक्यात पार्श्वभूमी अशी की, लाटेवाडी येथे आरोपी सागर परीट याचे गॅरेज आहे. २०१७ मध्ये पीडित मुलगी अल्पवयीन असल्याचे माहिती असूनही आरोपी सागर हा तिच्यावर एकतर्फी प्रेम करत होता. पीडित मुलगी महाविद्यालयात जात असताना त्याने तिचा हात पकडून विनयभंग केला होता, त्याबाबत पोलीस ठाण्यात बाललैंगिक अत्याचाराची तक्रार नोंद झाली होती. खटल्याच्या सुनावणीवेळी सरकारी वकिलांनी सहा साक्षीदार तपासले. पीडित मुलीसह इतरांच्या साक्षी महत्त्वपूर्ण ठरल्या. साक्षीदारांचे जवाब आणि सरकारी वकील कुलकर्णी यांचा युक्तिवाद ग्राह्य म्हणून न्यायालयाने आरोपी सागर परीट याला तीन वर्षे सक्तमजुरी व दहा हजार रुपये दंडाची शिक्षा तसेच दंड न भरल्यास तीन महिने जादा साधा कारावासाची शिक्षा देण्यात आली.

फोटो नं. १५०२२०२१-कोल-सागर परीट (आरोपी-कोर्ट)