कोल्हापूर : भगवान शिवशंकरांचे पुत्र असलेल्या कार्तिक स्वामी यांचे दर्शन महिलांना केवळ कार्तिक पौर्णिमेलाच घेता येते. त्यामुळे यंदा ‘कृत्तिका नक्षत्र’ या मुहूर्तावर हा योग गुरुवारी सायंकाळी ५ वाजून ५० मिनिटांपासून सुरू झाला. त्यामुळे असंख्य भाविकांनी जोतिबा रोडवरील कार्तिक स्वामी मंदिरात गर्दी केली होती.
विशेषत: कार्तिक स्वामी यांचे दर्शन घेतल्यानंतर वैवाहिक जीवन सुखी व धनसंपत्तीमध्ये वृद्धी होते, अशी आख्यायिका आहे. यानिमित्त मंदिराचे पुजारी शांतीनाथ कदम यांच्या हस्ते अभिषेक व पूजाविधी झाला. मोरपीस, गूळ-खोबरे अर्पण करून भाविकांनी दर्शन घेतले. रात्री उशिरापर्यंत दर्शनासाठी रांगा लागल्या होत्या. त्यामुळे दर्शनासाठी गर्दी झाल्याने रांग अंबाबाई मंदिराच्या पूर्व दरवाजापर्यंत पोहोचली होती.