आंबा : विशाळगड मार्गावरील मानोली धरणालगत टाकलेल्या पत्र्याच्या पेटीत अनोळखी महिलेचा मृतदेह सडलेल्या अवस्थेत आढळला. ३० ते ३५ वर्षीय महिलेचा गळा आवळून खून केला असावा, असा प्राथमिक अंदाज शाहूवाडीचे पोलीस निरीक्षक विजय पाटील यांनी वर्तविला.
रस्त्यापासून पन्नास फुटांवरील नायकाचा सरवा येथे गुराख्यांना रविवारी सकाळी पत्र्याच्या पेटीत सडलेल्या मृतदेहाची दुर्गंधी आली. पेटीत काळ्या साडीत गुंडाळलेला मृतदेह पाहून मानोलीचे पोलीस पाटील दत्तात्रय गोमाडे यांनी शाहूवाडी पोलिसात नोंद केली.
येथून विशाळगड जंगल सुरू होते. पाच दिवसांपूर्वी हा खून झाला असावा. महिलेचा रंग गोरा असून, उजव्या हातावर गोंदण्याचे निशाण आहे. महिलेचा खून करून मृतदेह पेटीत कोंबून दोरखंडाने बांधून विशाळगड मार्गावरील निर्जन भागात टाकल्याचे पोलिसांनी स्पष्ट केले. मृतदेह सडल्याने परिसरात दुर्गंधी पसरली. गुराख्यांच्या ही पेटी दृष्टीस पडली. शाहूवाडी पोलिसांनी पंचनामा करून मलकापूर ग्रामीण रुग्णालयात शवविच्छेदन करण्यात आले.
विशाळगडाकडे पर्यटनास म्हणून येणारी मंडळी या जंगल भागातील दुर्गमतेचा फायदा घेऊन घातपात घडवून आणणाऱ्या घटना या भागास नवीन नाहीत. धरण परिसरात ही पेटी आढळल्याने ही घटना उघडकीस आली, अन्यथा अशा घटना उजेडातही येत नसल्याचे ग्रामस्थांनी स्पष्ट केले.