कृष्णा, पंचगंगेची पाणीपातळी दोन फुटाने उतरली

बुबनाळ - :

शिरोळ तालुक्यातील कृष्णा आणि पंचगंगा नद्यांची पाणीपातळी आज दिवसभरात दोन फुटाने उतरली आहे. शिरोळ - नृसिंहवाडी मार्ग खुला झाल्याने पूरग्रस्त ग्रामस्थ घराची स्वच्छता करण्यासाठी येत आहेत.

कृष्णा आणि पंचगंगा नद्यांना आलेला महापूर दोन दिवस झाले संथ गतीने उतरत आहे. आज दिवसभरात दोन फूट पाणी पातळी उतरली असल्याने शिरोळ - नृसिंहवाडी मार्ग खुला झाला आहे. या मार्गावरून नृसिंहवाडीसह परिसरातील पूरग्रस्त ग्रामस्थ घरे, दुकाने स्वच्छ करण्यासाठी येत होते. घरातील, दुकानातील गाळ काढून नदीच्या प्रवाहाबरोबर धुवून घेतला जात होता. नृसिंहवाडी-औरवाड पुलाजवळ पाणी असल्याने नावाडी अरुण गावडे यांनी ग्रामस्थांना नावेतून स्वच्छतेसाठी घरी सोडले. गेल्या काही दिवसांपासून पावसाने उघडीप दिली असली, तरी कोयना धरणातून होणाऱ्या विसर्गामुळे पाणी संथ गतीने उतरत असल्याने स्वच्छतेसाठी अडचण येत आहे.

फोटो ओळ - : नृसिंहवाडी येथे स्वच्छता करताना पूरग्रस्त ग्रामस्थ (छाया - : रमेश सुतार, बुबनाळ)