प्रभागातील गल्ल्या, कॉलनी गायब

कदमवाडी : कोल्हापूर महानगरपालिकेने प्रसिद्ध केलेल्या प्रारूप मतदार याद्यांमध्ये मोठ्या प्रमाणावर घोळ झाला असून, प्रभागातील नावे गायब झाली आहेत. काही प्रभागांत पूर्ण गल्ली, काॅलनी गायब झाल्याचे प्रकार घडले आहेत. महानगरपालिका निवडणुकीच्या अनुषंगाने प्रारूप मतदार याद्या नुकत्याच प्रसिद्ध करण्यात आल्या आहेत. या यादीत संलग्नता नसून त्यामध्ये अनेक प्रकारचे घोळ असल्याने अनेक मतदारांची नावे एका प्रभागातून दुसऱ्या प्रभागात गेली आहेत, तर काही प्रभागांतील पूर्ण गल्ली, काॅलनीच दुसऱ्या प्रभागात गेली आहे. याद्यांमधील घोळामुळे आपल्या प्रभागातील नगरसेवकांना निवडण्याऐवजी दुसऱ्या प्रभागातील उमेदवाराला मतदान करण्याची वेळ काही मतदारांवर येणार आहे. मागील पंचवार्षिक निवडणुकीवेळी आमची नावे आमच्या प्रभागात असताना व आम्ही कोणताही बदल न करता आमची नावे दुसऱ्या प्रभागात गेली कशी, असा सवाल उपस्थित होत आहे.

शहरातील प्रभागाची सुरुवात जिथे होते त्यातील प्रभाग ६ मधील हॉकी मैदानाच्या पाठीमागील भाग यादीतून गायब झाला असून याच प्रभागातील अष्टेकरनगरमधील १५३ पैकी केवळ ७-८ मतदारांची नावे असून उर्वरित मतदारांची नावे शेजारील प्रभाग २ व ४च्या यादीत गेली आहेत, तर प्रभाग ९ मधील काटे मळा आदी परिसरातील ४०० नावे गायब झाली असून प्रभाग २० मधील ४०० ते ५०० मतदारांची नावे प्रभाग १८, १९, २२ व ६४ या प्रभागात गेली आहेत. काही प्रभागातील मतदार मृत होऊन १०-१२ वर्षे झाली तरी त्यांची नावे मतदार यादीत दिसत आहेत. काही ठिकाणी दुबार नावे झाली असून महिला मतदारासमोर पुरुष मतदाराचा फोटो, तर काही ठिकाणी एका नावासमोर दुसऱ्याचा फोटो असा घोळ झाला आहे.

पूर्ण नगरच दुसऱ्या प्रभागात

प्रभाग ६ मधील झूम प्रकल्पाशेजारील अष्टेकरनगर हे गेल्या दोन पंचवार्षिक निवडणुकीत प्रभाग ६ मध्ये होते. या पूर्णनगरातील १५०-१६० मतदारांची नावे प्रभाग २ व ४ मध्ये नोंद झाली आहेत. पोलीस लाईन प्रभाग हा पोलीस अधीक्षक कार्यालय ते पितळी गणपती, धैर्यप्रसाद ते सर्किट हाऊस, झूम प्रकल्पाची पूर्व बाजू ते हाॅकी मैदान, पद्मा पथक ते त्र्यंबोली काॅर्नर असा मूळ प्रभाग आहे. प्रारूप यादीत हा प्रभाग केव्हीझ पार्क, डायना पार्क, वारणा काॅलनी, जि. प. रोड ते विशाळगड कंपाऊंड हा नसणारा भाग या प्रभागात दाखवत आहे. प्रभागात वाढ, पण मतदार कमी. प्रभाग ६ हा २०१५ मध्ये ५१५२ मतदानाचा मतदारसंघ होता, पण तो आता ४५३१ चा झाला. यातील ६३१ मते कमी झाली आहेत. मग प्रभाग वाढला तर मतदार कमी कसे, असा प्रश्न उपस्थित होत आहे. प्रभाग क्रमांक २० मध्ये २०१५ ला ६४०० मतदार होते. हा प्रभाग आता ४९८१चा झाला आहे.

कोट : पालिकेने प्रसिद्ध केलेल्या याद्यांमध्ये संलग्नता दिसत नसून एका घरातील चार माणसे चार प्रभागांत विभागली गेली आहेत. प्रभाग वाढला असूनदेखील मतदान कमी कसे ही उघड्या डोळ्यांनी दिसणारी चूक आहे. चंद्रकांत घाटगे, भाजप जिल्हा उपाध्यक्ष महानगर.