करवीर तालुक्याची हॉटस्पॉटच्या दिशेने वाटचाल

कोपार्डे : करवीर तालुक्यात दिवसेंदिवस कोरोनाचा प्रादुर्भाव वाढत चालला आहे. १ एप्रिलपासून नवीन १८५ रुग्णांची भर पडली आहे. उपनगर, शहरालगतची गावे ही हॉटस्पॉट बनत चालली असून ग्रामीण भागातही रुग्ण वाढल्याने कम्युनिटी स्प्रेडचा धोका वाढला आहे.

करवीर तालुका कोरोनाच्या पहिल्या लाटेपासून जिल्ह्यात कोरोना रुग्णाच्या बाबतीत आघाडीवर आहे.

शहरालगतचा तालुका असल्याने आणि तालुक्यातील सर्व प्रशासकीय कार्यालये शहरात असल्याने नागरिकांना शहरात कामानिमित्त आणि नोकरीनिमित्त दररोजचा हमखास संपर्क आहे. याचाही परिणाम कम्युनिटी स्प्रेडचा मोठा परिणाम कोरोना रुग्ण वाढीवर दिसत आहे.

उपनगर व शहरालगतच्या गावात जनतेकडून सोशल डिस्टन्सिंगचा नियम पाळण्याला फाटा दिला जातो याशिवाय मास्क, सॅनिटायझरचा वापर करण्यात टाळाटाळ केली जात असल्याने दिवसेंदिवस इतर तालुक्यांच्या तुलनेत करवीर तालुक्यातील दररोजच्या रुग्ण वाढीचा दर दुप्पट वाढत चालला आहे

३० मार्चला तालुक्यात ८ रुग्ण सापडले होते. यानंतर गेल्या दहा दिवसांत १८५ नवीन रुग्णांची भर पडली आहे. दररोज किमान २० ते २५ रुग्ण तालुक्यात सापडत आहेत. आता कम्युनिटी स्प्रेडचा धोका दिसू लागला असून आमशी, म्हारूळ या ग्रामीण भागात रुग्ण सापडत असल्याने आरोग्य विभागाची झोप उडाली आहे. लसीकरणासाठी लस पुरवठा योग्य प्रमाणात होत नसल्याने लसीकरणाचे मोठे आव्हान आहे.

कोट...

करवीर तालुक्यात कोविड लसीकरणाला वेग देण्याच काम सुरू आहे. तालुक्यात २९ ठिकाणी कोविड लसीकरण सुरू असून आजअखेर ४५ वर्षांवरील ३७ हजार लोकांचे लसीकरण झाले आहे. जवळपास ४५ वर्षांवरील पात्र लोकांपैकी ४० टक्के लोकांना लसीकरण झाले आहे.

प्रतिक्रिया

करवीर तालुक्यातील रुग्णसंख्या वाढू लागली आहे. याचे लोण ग्रामीण भागात पसरण्याअगोदर जनतेने आपले घर आपली जबाबदारी घेतली पाहिजे. कोविड केंद्राची गरज असल्याने शिंगणापूर, केआयटी कॉलेज तसेच ग्रामीण भागात मागील वर्षी तयार केलेल्या केंद्रांची सतर्कता म्हणून तयारी ठेवणे आवश्यक आहे.

-राजेंद्र सूर्यवंशी, माजी सभापती, करवीर पंचायत समिती