‘गोकुळ’चे मतदान तालुक्यात होणार

लोकमत न्यूज नेटवर्क

कोल्हापूर : कोल्हापूर जिल्हा सहकारी दूध उत्पादक संघासाठी (गोकुळ) २ मे रोजी मतदान होत असून, कोविडच्या पार्श्वभूमीवर प्रत्येक तालुक्यात मतदान घेतले जाणार आहे. साधारणत: दीडशे मतांसाठी एक केंद्र अशा सुमारे २३ केंद्रांवर मतदान घेण्याची तयारी निवडणूक यंत्रणेनेे सुरू केली आहे.

राज्यात कोराेनाचा संसर्ग वाढल्याने सहकारी संस्थांच्या निवडणुका लांबणीवर टाकण्यात आल्या. मात्र, उच्च न्यायालयाच्या आदेशानुसार ‘गोकुळ’ची निवडणूक प्रक्रिया सुरू आहे. मात्र, कोरोनाचा संसर्ग दिवसेंदिवस वाढत आहे, त्यात लॉकडाऊनची शक्यता असल्याने ‘गोकुळ’ची निवडणूक कशी होणार, याबाबत उत्सुकता आहे. उच्च न्यायालयात सुनावणी दरम्यान हाच मुद्दा उपस्थित झाला होता. मतदारांची संख्या कमी असली तरी मतदानावेळी गर्दी होणार नाही, तालुकानिहाय मतदान घेऊन याची दक्षता घेतली जाईल, असे सहकारी निवडणूक प्राधिकरणने न्यायालयात सांगितले आहे. त्यामुळे तालुकानिहाय मतदान होणार आहे. साधारणत: एका केंद्रावर दीडशे मते अशा पद्धतीने २३ केंद्रांवर ही प्रक्रिया होऊ शकते.

लॉकडाऊन झाले तर प्रचाराचे काय?

राज्यातील कोरोनाची स्थिती भयानक असल्याने साधारणत: गुरूवार (दि. १५)पासून संपूर्ण राज्यात कडक लाॅकडाऊनची शक्यता आहे. किमान पंधरा दिवस म्हणजेच ३० एप्रिलपर्यंत लॉकडाऊन राहू शकते. या कालावधीत ‘गोकुळ’ची प्रचार यंत्रणा कशी राबवायची? असा प्रश्न दोन्ही आघाड्यांसमोर आहे. माघारीनंतर ठरावधारकांच्या गोळाबेरजेला वेग येणार असला, तरी लॉकडाऊनचा अडथळा राहणार आहे.

लॉकडाऊन झाले तरी माघारीसाठी यावेच लागणार

लॉकडाऊन करण्याच्या हालचाली सुरु असल्याने ‘गोकुळ’च्या माघारीची प्रक्रिया कशी राहणार? याबाबत उत्सुकता आहे. याबाबत इच्छुक उमेदवार, सूचक किंवा अनुमोदक यापैकी एकाला स्वत: हजर राहून उमेदवारी अर्ज माघारी घेता येणार असल्याचे निवडणूक निर्णय अधिकारी वैभव नावडकर यांनी सांगितले.

अशी असू शकतात केंद्र

तालुका मतदान केंद्रांची संख्या

गगनबावडा ७६ १

हातकणंगले ९५ १

शिरोळ १३४ १

आजरा २३३ १

गडहिंग्लज २७३ २

शाहूवाडी २८७ २

चंदगड ३४६ २

पन्हाळा ३५३ २

भुदरगड ३७३ २

कागल ३८३ २

राधानगरी ४५८ ३

करवीर ६४१ ४