बाजाराबाहेर बसण्यास विक्रेत्यांना बंदी

पोलीस अधीक्षक शैलेश बलकवडे ‘लोकमत’च्या वृत्ताची दखल

वाहतूक आराखड्यात सूचना

(बातमीचा लोगो)

१८०२२०२१-आयसीएच-०५

लोकमत न्यूज नेटवर्क

इचलकरंजी : येथील तीनही आठवडी बाजाराच्या ठिकाणी बाजारालगतच्या रस्त्यांवर भरणाऱ्या बाजाराला आवश्यक दिशा देत ठरवून दिलेल्या ठिकाणीच बाजार भरविणे. रस्त्यावर विक्रेत्यांनी बसू नये. वाहनांचे पार्किंग नियोजित केलेल्या ठिकाणीच व्हावे, अशा सूचना पोलीस अधीक्षक शैलेश बलकवडे यांनी शहराच्या वाहतूक आराखड्यामध्ये दिल्या. 'लोकमत' ने गुरुवारी याबाबत आवाज उठविला होता.

इचलकरंजी शहरामध्ये उडालेला वाहतुकीचा बोजवारा सुरळीत करण्यासाठी पोलीस अधिनियम १९५१ चे कलम ३३ पोटकलम १ (ब) अन्वये रहदारी विनियमनाच्या अधिकारानुसार पोलीस अधीक्षक बलकवडे यांनी २२ फेब्रुवारी ते ८ मार्च २०२१ या १५ दिवसांकरीता वाहतूक नियम निर्देश जारी केले आहेत. त्यामध्ये सिग्नल व्यवस्था, नवीन एकेरी मार्ग, पार्किंग झोन, नो पार्किंग झोन, सायलेन्स झोन अशा विविध बाबींच्या सूचना दिल्या आहेत. त्याचबरोबर बाजारादिवशी बाजार भरून आजूबाजूच्या रस्त्यांवर विक्रेते दुतर्फा ठाण मांडून बसतात. त्यामुळे बाजाराच्या दिवशी या मार्गावरील वाहतूक खोळंबते. याबाबत सविस्तर वृत्त ‘लोकमत’ने गुरुवारी प्रसिद्ध केले होते. त्याची दखल घेत थोरात चौकातील आठवडी बाजार नियोजित खवरे मार्केट येथे भरेल. रस्त्यावर अथवा चौकात रहदारीस अडथळा होईल, असे विक्रेते व हातगाडे किंवा रिक्षावाले थांबणार नाहीत. बाजारात विक्री व खरेदीसाठी येणाऱ्यांनी आपली वाहने मार्केटच्या उत्तर बाजूस असलेल्या रस्त्यावर एका बाजूला पार्किंग करावीत.

उत्तम-प्रकाश चित्रमंदिरसमोरील विकली मार्केटमध्ये नियोजित जागी विक्रेत्यांनी बसावे. लगतच्या रस्त्यांवर बसू नये. तसेच वाहनधारकांनी मार्केटच्या उत्तर बाजूस असलेल्या पूर्व-पश्चिम मार्गावर रहदारीस अडथळा होणार नाही, अशा पद्धतीने एका बाजूला पार्किंग करावे, अशा सूचना दिल्या आहेत.

१५ दिवसांसाठी राबविल्या जाणाऱ्या या वाहतूक आराखड्यासंदर्भात हरकती किंवा सूचना असल्यास शहर वाहतूक शाखा व पोलीस अधीक्षक कार्यालयात कळवावे, असेही म्हटले आहे.