शहरामध्ये ४१२९ नागरिकांचे लसीकरण

कोल्हापूर : महानगरपालिका प्रशासनामार्फत कोल्हापूर शहरात सोमवारी ४१२९ नागरिकांचे लसीकरण करण्यात आले आहे. लसीकरणासाठी सोमवारी दिवसभर सर्वच केंद्रांवर नागरिकांची मोठी गर्दी उसळली होती. तास, दोन तास लोकांना रांगेत उभे रहावे लागले. शहरातील आजअखेर ४५ वर्षांवरील ३७ टक्के नागरिकांचे लसीकरण पूर्ण झाले.

महापालिकेच्या ११ प्राथमिक आरोग्य नागरी केंद्रात तसेच शहरातील १८ खासगी रुग्णालयात लसीकरणाची सोय उपलब्ध करून देण्यात आली आहे. सोमवारी विक्रमनगर येथील भगवान महावीर रुग्णालय येथे लसीकरण केद्र सुरू करण्यात आले.

फुलेवाडी व महाडिक माळ या आरोग्य केंद्रामध्ये सर्वात जास्त ३९० नागरिकांचे लसीकरण करण्यात आले आहे. आतापर्यंत आरोग्य कर्मचारी १२ हजार ०२०, फ्रन्टंलाईन वर्कर्स ७०८९ व ४५ वर्षावरील ६६ हजार ७१७ नागरिकांचे पहिल्या डोसचे लसीकरण झाले आहे.