मामाला भेटून परत येताना मांजरेचे दोन युवक ठार

मलकापूर : करंजपेण - येळवण जुगाई मार्गावरील मोसम गावच्या हद्दीतील रस्त्यात थांबलेल्या डंपरला धडकून झालेल्या अपघातात मांजरे, ता. शाहूवाडी येथील दोन युवक जागीच ठार झाले. मृत झालेल्या युवकाची नावे अशी, बाळासाहेब लहू भातडे (वय २०), सचिन बाळकृष्ण शेलार (वय २२). ही घटना रात्री ७.३० वाजता घडली असून, याची नोंद शाहूवाडी पोलिसांत झाली आहे.

अपघाताबाबत शाहूवाडी पोलिसांतून मिळालेली माहिती अशी, बाळासाहेब भातडे व सचिन शेलार हे दोघे करंजपेण या गावी बाळासाहेबाच्या मामाला भेटण्यासाठी मोटारसायकल क्रमांक (एम एच ०९ - ए - ३६२४) वरून गेले होते. बाळासाहेब स्वत: मोटारसायकल चालवित होते. मामाला भेटून झाल्यानंतर हे दोघे करंजपेण - येळवण जुगाई रस्त्यावरून मांजरे गावाकडे येत होते. मोटारसायकल मोसम गावच्या हद्दीत आल्यावर मोसम गावात रस्त्याकडेला बंद असलेल्या डंपर क्रमांक (एम एच १० - सी. आर. ९७७२) वर मोटारसायकल जोरात धडकली. यामध्ये बाळासाहेब व सचिन या दोघांचा जागीच मृत्यू झाला. दोघांच्या डोक्याला गंभीर जखम झाली होती. अपघाताची माहिती मांजरे गावात समजताच नागरिकांनी घटनास्थळी गर्दी केली होती. मृत बाळासाहेब व सचिन या दोघांचे मृतदेह मलकापूर ग्रामीण रुग्णालयात शवविच्छेदनासाठी आणण्यात आले होते. वैद्यकीय अधिकारी यांनी मृतदेहांचे शवविच्छेदन केल्यावर मृतदेह नातेवाइकांच्या ताब्यात देण्यात आले. रात्री उशिरा दोघांच्यावर अंत्यसंस्कार करण्यात आले. बाबासाहेब यांचे शिक्षण पदवीपर्यंत झाले होते, तर सचिन हा हॉटेल कामगार होता. सचिन आई-वडिलांना एकुलता एक होता. या दोन युवकांच्या मृत्यूने मांजरे गावावर शोककळा पसरली आहे.

॥ हेल्मेट असते तर जीव वाचला असता ॥

बाळासाहेब व त्याचा मित्र सचिन हे दोघे बाळासाहेबांच्या मामाला भेटायला गेले होते. बाबासाहेब मोटारसायकल चालवित होते. दोघांच्याही डोक्यावर हेल्मेट नव्हते, जर हेल्मेट असते तर जीव वाचला असता.

फोटो

बाळासाहेब भातडे

सचिन शेलार