आजऱ्यात विनापरवाना जळाऊ लाकडासह ट्रक जप्त

हजगोळी-मडिलगे परिसरातून विनापरवाना जळाऊ लाकूड मालाची इचलकरंजी येथे बिगर परवाना व विनापास वाहतूक होणार असल्याची माहिती वनविभागाला मिळाली होती. त्यानुसार वनविभागाचे वनपाल बी. एल. कुंभार, रणजित पाटील, कृष्णा डेळेकर, नागेश खोराटे, तुकाराम जाधव, प्रवीण कांबळे, अनिल दळवी, सचिन कांबळे, गंगाराम कोकरे यांनी उत्तूर येथे सापळा लावला.

रात्री ११.३० वाजण्याच्या सुमारास ट्रकचालक रामदास बिरंजे (रा. नौकुड, ता. गडहिंग्लज) व सोबत ट्रकचे मालक व लाकूड ठेकेदार आनंदा काटकर (रा. हाजगोळी, ता. आजरा) ही विनापरवाना बिगरपासी जळाऊ लाकूड घेऊन जात असल्याचे लक्षात आले.

वनविभागाच्या पथकाने या दोघांनाही ताब्यात घेऊन ट्रकमधील जळाऊ लाकूड २२.९३२ घनमीटर लाकडासह ट्रक जप्त केला आहे. ट्रकसह जळाऊ लाकूड ३ लाख ७५ हजारांचे आहे. ट्रकचालक व मालक या दोघांच्यावर वन अधिनियमांनुसार गुन्हा नोंद केला आहे. पुढील तपास वनपाल बी. एल. कुंभार व नागेश खोराटे करत आहेत.

--- फोटो ओळी : आजरा वनविभागाने विनापरवाना व बिगरपासी जळाऊ लाकडासह जप्त केलेला ट्रकसोबत आरोपी.

क्रमांक : ३००५२०२१-गड-०१