शेंडा पार्क प्रयोगशाळेने केल्या तीन लाख स्वॅब चाचण्या

कोल्हापूर : जिल्ह्यात कोरोना रुग्णांची संख्या वाढत असल्याने प्रशासन आणि आरोग्य विभागाने पुन्हा एकदा आरटीपीसीआर चाचण्यांवर जोर दिला आहे. राजर्षी शाहू महाराज शासकीय वैद्यकीय महाविद्यालयाच्या शेंडा पार्क येथील प्रयोगशाळेने मंगळवारी (२७ एप्रिल) तीन लाख चाचण्यांचा टप्पा ओलांडला.

गतवर्षी कोरोना संसर्ग सुरू झाला असताना येथील स्वॅबचे अहवाल पुण्यातील राष्ट्रीय विषाणू प्रयोगशाळेतून येत होते. त्यामुळे अहवाल येण्यास मोठा विलंब लागत होता. त्याचा परिणाम जिल्ह्यातील कॉन्ट्रॅक्ट ट्रेसिंगवर होत होता. यानंतर आरोग्य राज्यमंत्री राजेंद्र पाटील-यड्रावकर यांनी पुढाकार घेऊन मिरज येथील शासकीय रुग्णालयामध्ये प्रयोगशाळा उभारली. परंतु, स्वॅबची संख्या वाढू लागल्याने आणि सांगली, कोल्हापूसह सिंधुदुर्ग जिल्ह्यातील स्वॅबही तपासणीसाठी मिरज येथे पाठविले जात असल्याने त्या ठिकाणीही विलंब होऊ लागला.

अखेर पालकमंत्री सतेज पाटील आणि जिल्हाधिकारी दौलत देसाई यांनी शेंडा पार्क येथील प्रयोगशाळेत या चाचण्या करण्यासाठीची यंत्रणा उभारण्याचा निर्णय घेतला. यासाठी आवश्यक सर्व साहित्य खरेदीची जबाबदारी जिल्हा परिषदेचे तत्कालीन मुख्य कार्यकारी अधिकारी अमन मित्तल यांच्यावर देण्यात आली. त्यांनीही सिंगापूरमध्ये आपल्या वैयक्तिक संबंधांच्या जोरावर ही यंत्रणा लवकरात लवकर कोल्हापुरात आणण्याची व्यवस्था केली आणि मे २०२० नंतर या ठिकाणी स्थानिक पातळीवरच चाचण्या सुरू झाल्या. त्यामुळे अहवाल तातडीने मिळू लागले.

चौकट

सध्या अडीच हजारांवर रोज चाचण्या

सध्या दुसऱ्या लाटेच्या कालखंडामध्येही आयसीएमआर यांनी घालून दिलेल्या निकषांनुसार रोज १०८० स्वॅबची चाचणी करण्याच्या सूचना आहेत. परंतु, कोल्हापूरच्या या प्रयोगशाळेत तीन शिफ्टमध्ये रोज अडीच ते तीन हजार स्वॅबची चाचणी केली जात आहे. यासाठी सध्या ११ कंत्राटी तांत्रिक, प्रतिनियुक्तीवरील सहा तांत्रिक, जिल्हा परिषदेने दिलेले सहा डाटा एंट्री ऑपरेटर कार्यरत आहेत. परंतु, हा कर्मचारी वर्ग अपुरा असल्याने अधिष्ठाता यांच्याकडे १० तांत्रिकांची मागणी करण्यात आली आहे. सध्या सूक्ष्मजीवशास्त्र विभागाच्या प्रमुख डॉ. नीता जांगले यांच्या मार्गदर्शनाखाली येथे काम सुरू असून, जिल्हाधिकाऱ्यांनी समन्वयासाठी जिल्हा परिषदेच्या ग्रामीण विकास यंत्रणेचे प्रकल्प संचालक डॉ. रवि शिवदास यांची नियुक्ती केली आहे.

चौकट

गेल्या आठ दिवसांतील चाचण्या

२० एप्रिल २८४१

२१ एप्रिल २५७२

२२ एप्रिल २५७२

२३ एप्रिल २५७२

२४ एप्रिल २८७४

२५ एप्रिल १९४७

२६ एप्रिल २१८८

२७ एप्रिल २४७३