‘त्यांना’ चित्रपटसृष्टीचे दारिद्र्य दिसत नाही

विलास रकटे यांची खंत : वृद्ध कलाकार आर्थिक सहाय कृतज्ञता समारंभ

कोल्हापूर : आता मराठी चित्रपटसृष्टीला चांगले दिवस आले असून, येथील कलावंत २५ लाखांपेक्षा जास्त मानधन घेत आहेत; परंतु त्यांना या चित्रपटसृष्टीतील दारिद्र्य दिसत नाही हे दुर्दैव आहे, अशी खंत चित्रपट अभिनेते विलास रकटे यांनी रविवारी येथे व्यक्त केली.शिवाजी पेठ, पेटाळा येथील राम गणेश गडकरी हॉल येथे कला संस्कृती परिवार (पुणे) यांच्यावतीने वृद्ध कलाकार आर्थिक सहाय कृतज्ञता समारंभाचे आयोजन केले होते. यावेळी ते प्रमुख पाहुणे म्हणून बोलत होते. अध्यक्षस्थानी ज्येष्ठ साहित्यिक प्रा. चंद्रकुमार नलगे होते. यावेळी कला संस्कृती परिवाराचे मेघराज राजेभोसले, अभिनेते भालचंद्र कुलकर्णी, अभिनेत्री शांता तांबे, प्रफुल्ल महाजन यांची प्रमुख उपस्थिती होती.यावेळी विविध मान्यवरांच्या हस्ते चित्रपटसृष्टीतील वृद्ध कलाकारांना प्रत्येकी एक हजार रुपयांच्या धनादेशाचे वितरण करण्यात आले. यावेळी त्यांच्या चेहऱ्यावरील आनंद द्विगुणीत झाला होता.
विलास रकटे म्हणाले, आता हिंदुस्थानात चित्रपटसृष्टीने जी गती घेतली आहे त्याची सुरुवात कोल्हापुरातून झाली आहे. कोल्हापूरच्या मातीतूनच हे रोपटे फुलले आहे. पूर्वी कलावंत कलेच्या मागे होते त्यांना पैशांचा ध्यास नव्हता; परंतु आता चित्र वेगळे आहे. वृद्ध कलाकारांच्या पोटाची खळगी नुसती शब्दांच्या श्रीमंतीने भरणार नाहीत तर सरकारने त्यांना आर्थिक मदत केली पाहिजे.प्रा. नलगे म्हणाले, वृद्ध कलाकारांचे मानधन देताना सरकारकडून दुर्लक्ष होत आहे. आता सरकारने त्यांच्याकडे लक्ष देऊन दु:ख दूर केले पाहिजे तसेच समाजानेही त्यांना समजून घेत मदतीसाठी पुढे आले पाहिजे.भालचंद्र कुलकर्णी म्हणाले, वृद्ध कलाकारांनी आपण एकटे आहोत असे समजू नये. आम्ही तुमच्यासोबत असून, तुमचे आयुष्य सुखा-समाधानाने व्यतीत होईल, यादृष्टीने प्रयत्नशील राहू.यावेळी मेघराज भोसले, प्रफुल्ल महाजन, वृद्ध कलाकार राजाभाऊ जाधव यांचे चिरंजीव रणवीर जाधव यांनी चित्रपट कलाकारांच्या व्यथा आपल्या भाषणात व्यक्त केल्या. या कलाकारांचे अश्रू पुसण्यासाठी आघाडीच्या कलाकारांसह लोकप्रतिनिधींनी पुढाकार घ्यावा, अशी मागणी केली.प्रा. मंजुश्री गोखले यांनी सूत्रसंचालन केले. नृत्यदिग्दर्शिका हेमसुवर्णा मिरजकर यांनी आभार मानले. (प्रतिनिधी)


यांना मिळाले मानधन
कै. नामदेव श्रीपती राऊत (कारपेंटर) यांच्या पत्नी शांताबाई राऊत
प्रभाकर कुलकर्णी (आॅफिसबॉय)
जयश्री भाट-दमे (पार्श्वगायिका)
विनोदवीर के. पंडित (मिमिक्री कलाकार)
आप्पालाल मुल्ला (वायरमन)
मंगला विधाते-साखरे (नृत्यकलाकार)
श्रद्धा पवार (अभिनेत्री)
कोया यमकर (कॅमेरामन)
दत्ताराम तावडे (संकलन दिग्दर्शक)
अशोक पाटील (प्रॉडक्शन मॅनेजर)
सावित्रीबाई पाटील (केटरर्स)
राजाराम जाधव (प्रॉडक्शन मॅनेजर)