तेरणीच्या ‘शानुल’ची बॉडी बिल्डींगमध्ये नाव कमावण्याची धडपड

(फोटो-०९०५२०२१-कोल-शानुल अंकली)

सादिक नगारसे, लोकमत न्यूज नेटवर्क

हलकर्णी : घरात अठराविश्व दारिद्र्य असताना जिद्द, मेहनतीच्या बळावर रंगरंगोटी व वाॅलपुट्टीचे काम करत तेरणी (ता. गडहिंग्लज) येथील शानुल हसन अंकली याने बॉडी बिल्डींगमध्ये अल्पावधीतच कोल्हापूरसह बेळगावमध्ये नाव कमावले. आर्थिक परिस्थितीवर मात करत त्याने राज्य व देश पातळीवर झेप घेण्याची तयारी सुरू केली आहे.

‘शानुल’ची ना शेती… ना अन्य कोणते उत्पन्नाचे साधन, यामुळे मोलमजुरीतूनच कुटुंबाचा उदरनिर्वाह सुरू आहे. वडील एका हाताने अपंग, आई दुसऱ्याच्या शेतात मोलमजुरीचे काम करते. अशातच शरीर पाहून मित्रांनी ‘बॉडी बिल्डींग’चा सल्ला दिला. शानुलने दोन वर्षातच १० वेगवेगळ्या स्पर्धांतून आपली योग्यता सिद्ध केली. परिस्थिती तुमच्या ध्येयापुढे नतमस्तक होते फक्त आपला निश्चय दृढ असायला हवा, असे काहीसे विचार असणाऱ्या ‘शानुल’ने अथक परिश्रमातून शरीरयष्टी कमावली आहे.

घरची परिस्थिती बेताची असल्याने तो रंगरंगोटी व वाॅलपुट्टी असे मजुरीचे काम करून कुटुंबाला हातभार लावतो. नेताजी पालकर ग्रुपने आयोजित केलेल्या स्पर्धेत त्याने यश मिळवले आणि तेव्हापासून त्याने मागे वळून पाहिलेच नाही. काेल्हापूरसह बेळगाव जिल्ह्यातील अनेक स्पर्धांमध्ये त्याने विजेतेपद पटकावले. आता त्याने राज्य व देश पातळीवर झेप घेण्याची तयारी केली आहे. आर्थिक परिस्थिती नाजूक असतानाही त्याने सुरू केलेले प्रयत्न निश्चितच कौतुकास्पद आहेत.

कोट -

घरची परिस्थिती हालाखीची असतानाही या क्षेत्राची निवड करण्याचे धाडस केले. मी कोणतेही काम मनापासून व झोकून देऊन करतो, कितीही अडचणी आल्या तरी त्यावर मात करून ध्येयापर्यंत पोहचेन.

- शानुल अंकली